Azem, ti je gjallë…

Kanë kaluar 20 vjet kur dora e krimit e lidhur me pushtetin vrau Azem Hajdarin. Dhe, çuditërisht, sot është po ai pushtet në fuqi edhe pse më kriminal se në ditët kur u vra Heroi i Demokracisë.

Sot patjetër që Shqipëria është ndryshe, por burimi i krimit shtetëror që ishte në atë kohë, është po ai që e kishte përcaktuar vet Azem Hajdari: Komunizimi vret!

Sot president nuk është ushujza Rexhep Mejdani por gjakpirësi Ilir Meta. Po, ai që në vitin 2001 shkeli gjithçka opozitare ndonëse vajti për homazhe në shtëpinë e Heroit të Demokracisë duke luajtur rolin e “Studentit të Dhejtorit”. Shkatërroi një sistem zgjedhor që as sot e kësaj dite nuk u kurua. Ai i cili e shkeli dhe e gjunjëzoi TV Shijakun, aty ku Azem Hajdari përçonte mesazhet e rëndësishme për të gjithë demokratët e gatshëm që ta ndryshojnë sistemin e kalbur komunist. Dhe, goditja ishte aq e fortë, sa, ky Tempull i fjalës së lire, e vuajti dhe po e vuan goditjen e dorës së kuqe të Ilir Metës. Po, arriti të bëjë koalicion edhe me partinë që Azem Hajdari ishte kryetar i saj i parë, PD, por parimet e shkelura të Azemit, dëshmuan se pse me një të kuq nuk bënë dot Marrëveshje. Koalicioni që Meta lidhi me Edi Ramën, dhe fadroma që iu vu gjithë asaj administrate që u mburrë deri në momentin e fundit me teserën e Partisë Demokratike, vulosi fjalët epike të Azem Hajdarit!

Sot kryeministër i Shqipërisë nuk është bashkëpunëtori i grekëve, Fatos Nano, por shërbëtori i grekëve, Edi Rama. Dora e shtetit të Nanos vrau Azem Hajdarin ndërkohë sot dora e shtetit të Edi Ramës vrau gjithçka shqiptare. Kur u vra Azemi, shpirti opozitar ishte gjallë dhe i bindur se Azemi është aty, në mesin e tyre. U çua i madh e i vogël për ti rikujtuar regjimit kriminal komunist: “Azem, Azem ti je gjallë!”

Sot ky shpirt është në grahmat e fundit, por hija e Azemit e mbanë të jetë aty ku atdheu kërkon, në mënyrë që dora e zezë komuniste të mos e realizon  edhe aktin e fundit.

Sot protestat nuk janë si ato kur në ball të tyre ishte Azem Hajdari, por fryma tij e mbanë gjallë çdo tubim, çdo kundërshti, çdo protestë

Sot Shqipëria nuk ka Ministër të Brendshëm, ish-ministrin e Mbrojtjes të monizmit, Perikli Teta, por situata është degraduar aq shumë sa këtë post sot e mbanë një hetues i këtij regjimi kriminal. Dhe jo vetëm kaq! Vëllau i këtij ministri është dënuar edhe për trafik droge, por kjo nuk e pengon kryeministrin Edi Rama që në krye të policisë ta vëjë Fatmir Xhafajn. Dhe sot policinë nuk e udhëheqë një njeri që menaxhoi vrasjet në kufi por ai që menaxhon kultivimin dhe shitjen e drogës.

Sot kryetar i Parlamentit të Shqipërisë nuk është ish-ministri i Arsimit nga koha e Enver Hoxhës, Skender Gjinushi, sepse regjimi aktual ka betonizuar krimin. Në krye të Parlamentit, Edi Rama ka vënë ish-ministrin e Brendshëm, Gramo Ruçi, dhe më fjala e lirë në parlament nuk vritet, ajo nuk ekziston fare. Opozita u detyrua që mesazhet e saj ti përçon nga elektorati, ndërkohë Ruçi dhe Rama vazhdojnë të kujdesen që zëri opozitar vetëm në foltoren e Parlamentit të Shqipërisë të mos zëjë vend.

Po, sot Shqipëria është anëtare e NATO-s por me qeverinë e cila largoi të gjithë ata oficerë që e përgatitën dhe e anëtarësuan vendin në Aleancën Veriatlantike.

Sot Shqipëria është vend kandidat për BE dhe gëzon liberalizim të lëvizjes së lirë të njerëzve dhe mallërave, por ka qeverinë e cila largoi të gjjithë ata zyrtarë nga Ministria e Jashtme, e Brendshme dhe ajo e Integrimit, që kontribuan dhe përgatitën vendin për të realizuar këtë qëllim.

Dhe në fund, sot pas 20 viteve, vrasësit nuk drejtohen nga qeveria për të vrarë, ata sot qeverisin vendin, dhe është Qeveria ajo që është në shërbim të vrasësve dhe bandave kriminale!

Por kot e kanë! Beteja kundër të keqes më të madhe të këtij kombi, komunizmit, nuk është betejë e humbur. Të gjithë demokratët, kur flasin për betejat e fundit që duhet dhënë kësaj rrace të ndytë, flasin për betejat me modelin e Azem Hajdarit. Demokratët kur flasin për strategji elektorale flasin për domosdoshmërinë e mobilizimit me modelin e Azem Hajdarit. Demokratët kur flasin për protestën dhe organizimin e saj, kanë parasysh vetëm modelin e Azem Hajdarit. Dhe në fund, të mos harrojmë, demokratët kur flasin për fatin e Kosovës, flasin vetëm ashtu siç e kishte menduar gjithmonë Azem Hajdari. Azem ti je gjallë…