Azil Shëndetësor!

nga Agim Popoci

Pas largimit të Drejtorit të Institutit të Studimeve për Krimet dhe Pasojat e Komunizmit, Agron Tufa, nga shënjestra e kriminelëve komunist shqiptar duke kërkuar azil politik në një nga qendrat model të demokracisë, Zvicër, banda e kuqe u hodh në aksion me sulme të përqëndruar, pse shkrimtari i njohur shqiptar iku në këmbët e veta për të kërkuar strehim politik.

Ndonëse nuk mungoi mbështetja e miqve dhe kolegëve, i frikshëm ishte zelli i “kolegëve komunist” për ta akuzuar Agron Tufën për stisjen e kërcënimeve për jetë, të atij, zonjës Elvanë dhe fëmijëve edhe pse nuk ishin asgjëkundi për të reaguar kur këto kërcënime u shfaqën; Nuk kërkuan as zbardhjen e tyre, nuk rudhën as krahët por inkurajuan bandën e Edi Ramës që të luftojnë të gjithë ata që marrin guximin ta thonë me zë, se partizanët komunistë me në krye Enver Hoxhën kanë kryer edhe krime.

Kriminelët komunistë me në krye Komandant Takun sot e akuzojnë Agron Tufën si një njeri ordiner, hajdut e mashtrues i neveritshëm, por kur ishte në tokën shqiptare ata nuk e akuzuan për këto arsye por sepse Instituti që ai drejtonte kishte filluar të publikonte dëshmitë mbi tmerret dhe krimet që paraardhësit e tyre i kishin bërë dhe këta po i sofistikonin.

Banda e kuqe e quan të turpshme dhe të shëmtuar ikjen e Agron Tufës sepse nuk e çuan deri në fund planin e tyre të zi. Ky klon i bandës së Enver Hoxhës që sot terrorizon tokën shqiptare, është e vërtetë se nuk duan që të vrasin, por duke vepruar me udhëzimet më makabre nga metodologjia e Mehdi Bushatit me kompani, kundërshtarët politik duan ti mbajnë rrugëve në gjendjen siç e transformuan vajzën e Tuk Jakovës. Duan ti lënë si model, të lidhur me zinxhir rrugëve të Tiranës dhe jo vetëm, në mënyrë që njeriu socialist të cilin po e krijojnë, ta shohin se çfarë mund ti ndodhë atij që i del kundër pushtetit sundues komunist.

Kjo është dhe arsyeja kryesore pse është e zemëruar kjo bandë e kuqe dhe vazhdon nga frengjitë  e rrjeteve sociale ta sulmoj Agron Tufën me familje edhe kur iku nga kthetrat kriminale.

Sot, kur Agron Tufës i është dhënë statusi i azilantit politik dhe kriminelët komunistë janë para një fakti të kryer të demokracisë perëndimore, ata sërish nuk dorëzohen. Përmes Spartak Brahos i bëjnë me dije se do të bëjnë të pamundurën që edhe atje ku ka kërkuar azil politik, nuk do të gjejë vrimë ku të futet, dhe të mos pandehë se e hodhi pa u lagur!

Kështu, sot, ky zemërim publik i bandës së kuqe i jep të drejtë Agron Tufës pse është larguar nga toka shqiptare; Pse kërcënimin komunistë e ka mirëkuptuar dhe duke u bazuar në përvojën e tij jetësore, që ishte dhe arsyeja kryesore, e kishte të qartë se kriminelët komunist vetëm në këtë pikë nuk tallen.    

Sot, të gjithë e kanë të qartë se bandës së kuqe jo vetëm që i pengon Agron Tufa si Drejtor Institutit të Studimeve për Krimet dhe Pasojat e Komunizmit por e duan edhe azilant, vetëm jo, politik!

Sot është e qartë se kriminelëve komunist u dështoi plani sepse Agron Tufën e donin me barrel, që në një nga kryeqendrat e “imperializmit” të kërkoj azil. Po, por azil shëndetësor; Që të mos ketë më as takatin ta thotë të vërtetën e krimeve komuniste, dhe të mos inkurajojë gjeneratat që po vijnë.

Sot, kur Agron Tufës, Zvicra zemërgjerë i dha mundësi për të jetuar me familje, për të gjithë shqiptarët dhe jo vetëm, është e qartë se në Shqipëri mund të jetohet edhe me tërmete të frikshme që sot po e tundin tokën shqiptare pa mëshirë, por nuk mund të jetohet përderisa jeton dhe vepron kërma e kuqe.