Babai shqiptar që vrau vajzën në Australi, sot u dënua me…

Babai shqiptar i cili i mori jetën të bijës korrikun e vitit të kaluar në Australi, Petrit Lekaj, sot u dënua me 20 vite burg pa të drejtë apelimi të këtij dënimi.

Gjykatësja që dha vendimin e konsideroi krimin “shkelje katastrofike” e raportit mes babait dhe vajzës.

“Lidhja midis prindit dhe një fëmije është zakonisht thelbësore,” tha ajo.

Në argumentimin e vendimit gjykatësja tha gjithashtu se autori, u zemërua aq shumë dhe humbi toruan kur e bija, Sabrina nuk reagoi në mënyrën siç ai e kishte pritur gjatë zënkës brenda në makinë për mënyrën e saj të jetës.

Pak ditë më parë, në gjykatë u zbulua për herë të parë edhe arsyeja e zënkës mes tyre natën e ngjarjes së rëndë.

Lekaj, një anëtar i mirënjohur i komunitetit shqiptar të Adelaide, kishte marrë me vete një thikë 15 cm të gjatë dhe bashkë po shkonin të blinin ushqime, kur mes tyre nisi grindja në makinë.

Babë e bijë u zunë për stilin e jetesës që kishte nisur të bënte vajza dhe ai dyshonte se e reja kishte nisur përdorimin e drogës.

Pak para se ta qëllonte, Petrit Lekaj i është drejtuar vajzës me fjalët “po e çon jetën dëm“, por ajo i ishte përgjigjur se “nuk i interesonte“.

Lekaj nxori thikën që e kishte fshehur në pantallona dhe e goditi në stomak ndërsa ajo po shikonte nga dritarja e makinës.

Ndërsa ajo nisi të bërtiste për ndihmë, babai e mbështeti në sedilje dhe e goditi me thikë edhe shtatë herë të tjera, u tha në gjykatë. Pas vrasjes, Lekaj u gjet pranë vajzës së tij me plagë të rëndë në stomak dhe u kurua në Spitalin Royal Adelaide.