Babalja nuk ekstradohet, Haradinaj: Pas vendimit të Gjykatës, ndërhyn politika…
“Pa kaluar të gjitha etapat ligjore nuk ka ekstradim të Albert Veliut. Politika ndërhyn pasi merr vendim drejtësia!” Kështu u shpreh kryeministri i Kosovës, Ramush Haradinaj duke ju përgjigjur interesimit të pranishmëve për “Rastin Babale” gjatë një ligjërate në UET në Tiranë duke sqaruar se kjo çështje mund të diskutohet kur një vendim i mundshëm për ekstradimin e “Babales “të vijë te Ministria e Drejtësisë.
“Ne bëjmë kujdes kur bie fjala te ndarja e pushteteve. Deportimi i gylenistëve ka qenë një mësim për të respektuar të gjitha procedurat ligjore të Kosovës kur bie fjala tek ekstradimet,” e pranoi Ramush Haradinaj ku kishte një këshillë edhe për shërbimet e inteligjencës në Kosovë dhe Shqipëri.
“Duhet të merren me fushatën kundër ardhjes së kosovarëve në Shqipëri!”
Këtë shqetësim, Ramush Haradinaj e thekson, meqë sipas tij, kjo është diçka e orkestruar, me qëllim pengimin e ardhjes së kosovarëve në Shqipëri.
Ndryshe, esktradimi i Albert Veliut i njohur si Babalja në Shqipëri, i cili kërkohet nga drejtësia shqiptare pas publikimit të audio përgjimit të pretenduar ndaj vëllait të ministrit Fatmir Xhafaj, është refuzuar nga Gjykata Themelore në Prishtinë.
