Bac s’u kry!
nga Agim Popoci
Kanë kaluar 12 vjet Bac kur të kemi thënë: Bac u kry!
Ca sharlatanë menduan se të kanë rrejt, por jo Bac, këta që e shpallën Pavarësinë, as Urën e Ibrit në Mitrovicë nuk kishin guxim ta shikonin në sy, e lëre më 30 mijë refugjatët shqiptarë në tokën e tyre, që ishin dëbuar nga Veriu i vendit.
Dhe jo vetëm kaq! Shumë ujë ka kaluar Bac nën këtë Urë, dhe askush nuk e kishte menduar më 17 shkurt 2008 se edhe për eshtrat e Isa Boletinit do të duhet të kërkojmë leje nga Serbia për ti çuar në Boletin. Por ja që ndodhi, Bac! Turp e faqja e zezë!
Me botën Bac po na bllokon Serbia, por nuk po kanë kohë pushtetarët tanë të merren me këtë punë. Tirana dhe Prishtina kishin punë të tjera Bac, për 12 vjet! A jemi anëtarësuar në OKB! Jo, Bac, dhe në shumë organizma të tjerë ndërkombëtarë. Me Qeveritë që kishim, nuk lodhej njeri me bashku Mitrovicën, e lëre më me u bashku me INTERPOL, OSBE, OKB, NATO e BE. Qysh ja bëri Kroacia?! E mor Bac, liderët kroatë e kanë dashtë dhe e duan vendin e tyre, dhe deri sa e hoqën shkaun nga toka kroate, ata nuk e quanin festë anëtarësimin në OKB.
Trepça, Bac, deri sa ti ishte gjallë i mbushke xhepat e shtetit serb, sot, po i mbushë xhepat e hajnave që qeverisën Kosovën, e që ti i njeh ma mirë se çdo njëri këtu!
Obiliqi, Bac, sa luftoje ti për këtë vend, Kosovës i jepte tym e helm ndërsa Serbisë pare ndërsa shqiptarët nuk kishin energji elektrike në shtëpi. Pak gjë ka ndryshuar, vetëm se paret kanë gjet tjerë xhepa e shqiptarët po ngushëllohen kur 8:2 bëhet 4:2. Gëzim i madh! Madje edhe një investim gjerman që u bë për linjën e interkonjeksionit me Shqipërinë, ka mbet gërmadhë, dhe sot po e përdorin vetëm zogjtë sepse Serbia nuk po lenë me u lidhë me rrjetin evropian!
Arsimi dhe Shëndetësia, Bac, janë më keq se sa kur kishim sistemin paralel dhe shkaun mbi kokë. Po, po, Bac, e pabesueshme por e vërtetë. Të korruptuar nuk ishin shqiptarët e varfër para lufte, por, sot, pa euro dhe pa pushtet, je i mbaruar në shtetin e pavarur dhe sovran të Kosovës.
“Plazma keksat” dhe “tomlin e Kralevës” i harruan shqiptarët për pak çaste, Bac, por sot kur po i kërkon Washingoni dhe Brukseli. Po thonë dialogu me Serbinë ndryshe nuk bëhet, por e keqja më e madhe nuk është këtu. Malli për “Plazma keksa” i ka marrë këta që ishin deri dje në pushtet, po thonë nuk bënë me u hatrue me ndërkombëtarët. Nuk e pranojnë as reciprocitetin e “Plazma keksit” me biskotat e Kosovës e lëre më “tomlin e Kralevës” me qumështin e Rugovës; Mos e bë Zot me atë të Shalës!
Pas 12 viteve që u shpall Pavarësia e Kosovës dhe i gjithë veriu vazhdon të jetë i pushtuar nga Serbia, Bac, ka dhe një lajm të mirë: Hajnat që ti e njehë më mirë se ne, nuk janë më në pushtet! Ai djali i ri në krye të studentëve, që shkijet e tërhiqnin zvarrë në qendër të Prishtinës dhe ti luftoje për tokën e Kosovës, Albin Kurti, sot është Kryeministër!
Po Bac, e di që ti nuk mund të jesh i kënaqur dhe nuk kemi si të themi prehu i qetë, dhe 12 vjetori nuk na bënë krenar për shtetin që kemi, por, nëse ky vend mund të bëhet ka mbet vetëm një shpresë dhe kjo është Qeveria e re e cila është zotuar para dy javësh. Nuk e di se a mund të premtojmë për 15 vjetorin e Pavarësisë së Kosovës, se ky vend do të ketë arsye për të festuar; Por, sytë dhe veshët e të gjithë shqiptarëve janë drejtuar nga Kryeministri i ri Albin Kurti dhe qeveria e tij, dhe do të punojnë për ta çuar amanetin tënd në vend.
Sot do të ishte mirë që kjo ditë feste të na bëjë krenar, por sot çdo shqiptar të kërkon falje sepse në 12 vjetorin e Pavarësisë së Kosovës e kanë të qartë, dhe nuk kanë më shumë për të thënë, se sa:
Bac s’u kry!
