Balfin shet FINAL-in te IuteCredit, miratohet përqendrimi
Autoriteti i Konkurrencës ka miratuar transferimin e 100 për qind të kuotave të kompanisë FINAL sha tek IUTECREDIT ALBANIA sha. Referuar vendimit të Komisionit të Konkurrencës njoftimi për shitjen e aksioneve ka ardhur në prill të këtij viti ku ndër të tjera argumentohej se blerja lidhej me objektivat e IUTECREDIT për diversifikimin e portofolit të saj në fushën e kredive konsumatore dhe qirasë financiare, si dhe të rrisë numrin e operatorëve ekonomikë me të cilët ekzistojnë marrëveshje bashkëpunimi për financimin e blerjes së produkteve nëpërmjet kredive.
Lidhur me këtë përqendrim komsioni i konkurrencës ka bërë një analizë për impaktin që mund të sjellë në treg kjo lëvizje. Duke iu referuar të dhënave zyrtare Komisioni raporton se në tregun e kredisë, mikrokredisë, qirasë financiare dhe faktoringut të ofruara nga Subjektet Financiare Jo-Bankë operojnë gjithsej 22 shoqëri, ku pjesën më të madhe e zotërojnë tre shoqëri.
“Tregu gjatë vitit 2017 paraqitet i hapur (licencimi për kredi dhe mikrokredi) dhe kjo evidentohet nga hyrja e tre konkurrentëve të rinj në treg. Shoqëria IuteCredit Albania paraqitet me një pjesë tregu të vogël ndërkohë që shoqëria Final SHA ka një fuqi në treg të limituar. Pas realizimit të përqendrimit fuqia ekonomike e IuteCredit Albania SHA ngelet pothuajse në të njëjtat nivele si para realizimit të transaksionit” vlerëson Konkurrenca. Këto të dhëna si dhe vlerësimi se nuk kemi mbivendosje horizontale të kompanisë kanë bërë që Autoriteti i Konkurrencës të miratojë vendimin.
FINAL dhe IUTECREDIT
Final sh.a u regjistrua në Qendrën Kombëtare të Biznesit në 11 janar 2008 duke pasur në objekt qiradhënien financiare, kredidhënien si dhe aktivitet në fushën e pasurive të paluajtshme por jo vetëm. Gjatë viteve ka pasur disa ndryshime në emrat e aksionerëve apo peshën që kishte secili në aksione brenda shoqërisë por në momentin e shitjes kapitali I saj ishte 100 milionë lekë dhe aksionerë ishin: grupi Balfin 38.14 për qind të aksioneve, RIVER STYXX CAPITAL 38.11 për qind, Adrian Koni 10.88 për qind, Ali Vishaj 7.6 për qind dhe Majlinda Demko 5 për qind.
Sipas bilancit të vitit 2016 kompania regjistroi një fitim para taksave në nivelin 14.5 milionë lekë duke pothuajse e trefishuar atë në raport me 2015. Totali i të ardhurave ishte 61 milionë lekë ndërkohë që shpenzimet 46.7 milionë lekë.
Kompania blerëse në këtë rast, IUTECREDIT Albania u regjistrua në Qendrën Kombëtare të Biznesit në 11 gusht 2014 si një shoqëri aksionare me objekt aktivitet në fushën e operacioneve tregtare dhe financiare të kredidhënies. Kompania zotërohet në 100 për qind të kuotave të saj nga AS IuteCredit Europe e cila është një kompani me bazë në Estoni dhe që ofron shërbime për kreditimin e konsumatorëve. Kompania është themeluar në Estoni në vitin 2008 dhe operon edhe në Moldavi.
Referuar bilancit të vitit 2016 kompania regjistroi një humbje para tatimit prej 5.4 milionë lekësh. Totali i të ardhurave të tjera ishte 107 milionë lek./Monitor/
