Balla tha se ka komunikim zyrtar mes PS dhe LSI/ Ja reagimi i Vasilit…
Ligji për magjistraturën vuri në një “provë” maxhorancën për të siguruar 84 vota, pasi për miratimin e tij.
Mungesa e opozitës në sallë, pas bojkotit për shkak të tjetërsimit të votës së një deputeti të LSI, bëri të pa mundur gjetjen e 84 anëtarëve të pranishëm në Kuvend.
Pas mbarimit të seancës deputeti i PS, Taulant Balla në një dalje për mediat deklaroi se ishin në negociata me LSI, për zgjidhjen e ngërçit dhe miratimin e ligjit për magjistraturën.
“Po ju them dhe dua të jem shumë transparent që kemi një komunikim zyrtar me LSI për këtë çështje, por dua të theksoj që të ruajmë konsekuencën e qëndrimeve tona për një çështje të caktuar. Për çështjen e Shkollës së Magjistraturës, edhe LSI edhe PD duhet të qëndrojnë konsekuent asaj që kanë pasur edhe dy vite më parë, dakordësinë për të vijuar procesi i pranimeve. Pse jemi sot në kohë vonese dhe na duhet të ndryshojmë një aspekt që ka të bëjë me afatin”, ishte kjo deklarata e Ballës për mediat.
Por pak orë më vonë Petrit Vasili i ftuar në Ora News, deklaroi se nuk kishte asnjë gjë të vërtetë në deklaratën e Ballës.
Kryetari i Grupit Parlamentar të LSI, Petrit Vasili hodhi poshtë deklaratën e Taulant Ballës, dhe tha se nuk ka asnjë komunikim me maxhorancën.
“Nuk ka asnjë komunikim dhe ka zero komunikim zyrtar me PS për nisma ligjore për të cilat bëhet fjalë siç është statusi i gjyqtarëve dhe prokurorëve. Pra ka zero komunikim zyrtar me PS”, ishte kjo deklarata e Vasilit.
