Balli Kombëtar i Edi Ramës!

nga Agim Popoci

U keqtrajtuan, burgosën dhe vranë nga komunistët për rreth 50 vjet, por nuk u përçanë, ngeli ai që ishte, krenar dhe i fortë, Balli Kombëtar. Me komunistët nuk i bashkoi asgjë, as çështja kombëtare, as pushtimi fashist, as Mukja dhe as Bujani  sepse qëllimi i kriminelëve komunistë ishte pushtimi i tokës shqiptare.

Shumë prej idhtarëve të Ballit u mërzitën shumë kur u përça Balli Kombëtar. U tha për çështje parimore! Por, sot, për fat të keq, na del se nuk ishte çështje parimore. Sot kur krijohet edhe një “Balli Kombëtar” me të njëjtit protagonist, gjendja është shumë më shqetësuese.

Po, sot pasardhësi i Enver Hoxhës, kryetari i PSSH, Edi Rama arriti të bashkoj dy degët e përçara të Ballit Kombëtar në një opozitë të vetme, për ti shërbyer atij në ruajtjen e pushtetit. Ky nuk është as i Mid’had Frashërit, as i Adriatik Alimadhit dhe as i Artur Roshit por është Balli Kombëtar i Edi Ramës

U fol shumë për insinuata dhe arsye nga të ndryshme si dhe mospërfilljen e Partisë Demokratike, por, pse sot, prezenca e Ballit Kombëtar si opozitë e Edi Ramës në Parlamentin e Shqipërisë konsiderohet asgjë më pak se sa TURP KOMBËTAR!

Duke lënë mënjanë qëllimet ose mospërfilljen nga ana e Lulzim Bashës, duke lënë mënjanë edhe hatanë që si Adriatik Alimadhi ashtu dhe Artur Roshi mund të bëjnë me prezencën e tyre në Parlamentin më kriminal në historinë e Shqipërisë, liderët e Ballit Kombëtar dhe Ballit Kombëtar Demokrat janë në politikë me programin e qartë të Ballit Kombëtar, program i cili me 10 pika e bënë krenar çdo shqiptar që të jetë pjesë e kësaj lëvizje kombëtare.    

1.Luftojmë për Flamurin Kuq e zi, për mbrojtjen e të drejtave të popullit shqiptar.

Si do ta realizojnë këtë Alimadhi dhe Roshi, me Edi Ramën kryeministër, ku ca shqiptarë i cilëson alpin e ca çeçenë, ca budallenj e ca të marrë, ca lulusha e ca salusha, me këtë njeri, si mund të luftohet për Flamur Kuq e Zi?!

Historia e Ballit Kombëtar nuk është mandati i Alimadhit dhe Roshit në Parlament, as marrëdhënia që kanë ata me Lulin ose Saliun. Brezat e ardhshëm ashtu siç jemi dhe ne brezat e dikujt, vetëm për virtytin e pjesëtarëve të kësaj lëvizje krenohemi se jemi shqiptar, dhe këtë duhet ta ketë parasysh çdo udhëheqës.

2.Luftojmë për një Shqipëri të Lirë, etnike, demokratike, me bazë shoqërore moderne.

Adriatik Alimadhi, Artur Roshi dhe jo vetëm, duhet ta dijnë se për 50 vjet torturat, vrasjet dhe propaganda komuniste nuk arriti të thyej qenien e Ballit, as marrëzirat e Edi Ramës për ballistët me pula që broçkulliste nga foltorja e Parlamentit të Shqipërisë, sepse qëllimi i Ballit Kombëtar ishte dhe ngeli, krijimi i një Shqipërie me bazë shoqërore moderne. 

3.Luftojmë për një Shqipëri ku do të mbretërojë liria e fjalës dhe e mendimit.

Pra, pikërisht për mungesën e lirisë së fjalës dhe mendimit, dhe tekeve kriminale  të shokut Gramoz, deputetët e opozitës dorëzuan mandatet. Jo për tu futur në Parlament Alimadhi ose Roshi, sepse këtë mundësi ligjore e kishin parasysh ata që e menduan këtë aksion opozitar; Ashtu siç e kishin parasysh edhe rrjedhjen e ndonjë kandidati nga lista e PD, por kurrë, në asnjë rrethanë, askush as që e ka çuar nëpër mend se këtë mund ta bëjë një pjesëtar i Ballit Kombëtar. Jo pse ai quhet Adriatik ose Artur, por mbi supet e tyre është një trashëgimi, është një histori, është një program kombëtar nga i cili nuk duhet të lëviz as roja i selisë së partisë dhe lëre më një kryetar partie.

4.Luftojmë për një Shqipëri të rregullueme ekonomikisht dhe shoqërisht, në mënyrë që të mos ketë shfrytëzues dhe të shfrytëzuem, d.m.th të mos ketë njerëz që jetojnë në kurriz të të tjerëve; mos të ketë bujq pa tokë të vetën të mjaftueshme, puntorë krahu dhe mendjeje pa banesë dhe jetë të sigurueme, pra një Shqipëri të rregullueme me një sistem ekonomik rrënjësisht të reformuem simbas shpirtit dhe nevojave të popullit shqiptar.

Një Shqipëri e tillë, me Edi Ramën kryeministër është e pamundur. Ekonomikisht dhe shoqërisht kjo Shqipëri është shitur dhe goditja që i është dhënë me  PPP-të, jo Tiku ose Turi, po as Zot nuk ka që ta shpëtoj deri në anulimin e të gjitha Partneriteteve Publiko Private kriminale.

5.Luftojmë për një Shqipëri ku do të zbulohen, do të përkrahen dhe do të rriten vlerat e fshehura në çdo shtresë të popullit, me anë të shkollës shqiptare.

Po, shkolla shqiptare ishte dhe ngeli themeli i këtij kombi, por jo me komunistët. Goditja që i dha Edi Rama sistemit të Arsimit dhe atij të Drejtësisë, jo deputetë por as ministra të Arsimit, nuk kanë se çfarë bëjnë Adriatik Alimadhi dhe Artur Rodhi, prandaj pesha e turpit që kanë marrë mbi vete nuk i lanë as Vjosa dhe as Drini sikur të bashkohen për ta shpëla Parlamentin e Shqipërisë.

6.Luftojmë për një Shqipëri ku do të çmohen drejtësisht të gjitha vlerat, pa dallim moshe, krahine, besimi apo klase.

Kjo është dhe pika ku i ndanë komunistët nga ballistët. Internacionalizmi komunist sulmoi fillimisht këto vlera, që Balli Kombëtar i ka ruajt me fanatizëm, dhe nuk ka se pse i shkel askush për hir të Edi Ramës. Qoftë dhe i shtrënguar nga ndonjë hall kriminal ose familjar.

7.Luftojmë për të formue një Shqipëri të drejtueme nga njerëz të pa kompromentuem, nga shqiptarë që nuk janë kursyer në çdo kohë e në çdo rrethanë për shpëtimin dhe të mirën e këtij vendi, prej burrash puntorë, të aftë e të ndershëm.

Dhe derisa do të ekzistoj Balli Kombëtar duhet të luftoj për një Shqipëri të drejtuem nga të tillë njerëz, dhe jo për ti shërbyer njerëzve si Edi Rama. Ky njeri për aktet kriminale të të cilit opozita sot është në rrugë, dhe nuk ka arsye në këtë tokë shqiptare dikush ti shërbej. Aq më shumë lider të Ballit Kombëtar.

8.Luftojmë për një Shqipëri që të dënojë pa mëshirë dhe në mënyrë shembullore antipatriotët, tradhtarët, të shiturit, ngatërrestarët, spekuluesit, spiunët; për një Shqipëri ku nuk do të kenë vend dallkaukët, servilët dhe të gjithë ata që pengojnë zhvillimin dhe përparimin e Shqipërisë së Rilindur.

Togfjalëshi i fundit mund të ketë qenë dhe pika ku janë menduar paksa Adriatik Alimadhi dhe Artur Roshi, por rilindja e Edi Ramës rezultoi se është vjedhja, shkatërrimi, gjunjëzimi, turpërimi dhe së fundi përçmimi, virtyte këto që mund të përkojnë me një sejmen komunist por në asnjë mënyrë me një pjesëtarë të Ballit, që bie në gjumë dhe zgjohet duke menduar vetëm për Shqipërinë.

Sot për të dënuar pa mëshirë dhe në mënyrë shembullore antipatriotët, tradhtarët, të shiturit, ngatërrestarët, spekuluesit, spiunët, është shumë e lehtë. Nëse futen në sitë ligjore së bashku edhe me siglën e partisë PSSH, shumë pak anëtarë të saj mund të shpëtojnë. Jo se mund të ketë të mirë, por mund të ketë prej atyre që nuk kishin asgjë në dorë që të tradhtojnë, shesin, ngatërrojnë, spekulojnë ose spiunojnë.

9.Luftojmë për të harmonizue dhe bashkue energjitë e Kombit, për të gatue bashkimin mendor dhe shpirtëror të të gjithë shqiptarëve.

Pikërisht kjo është pika e programit të Ballit Kombëtar që i bënë pjesëtarët e saj të jenë ndryshe nga komunistët. Nëse në vitin 1912 Fuqitë e mëdha e ndanë tokën shqiptare në dy pjesë, komunistët e copëtuan fare. Sot gegë dhe toskë nuk dëgjohet fare sepse ka malok dhe kosovar, madje kjo mendje kriminale shpiku dhe kosovar të Maqedonisë. Ka të saliut, lulit dhe shqupit; Dhe kur janë të kudondodhur dh eluftojnë si për Kosovën ashtu dhe Maqedoninë, si për Çamërinë ashtu dhe Luginën e Preshevës, Plavën, Gucinë dhe Ulqinin, pagëzohen si ballistë. Bashkimi mendor dhe shpirtëror u nda në mijëra pjesë edhe me Reformën në Drejtësi. Të Saliut dhe Likes përfunduan rrugëve dhe kur nuk ishin prej tyre dh merrnin shumë lekë dhe jashtë kontrollit, etiketoheshin si ballistë; Tashmë vazhdon lufta brenda llojit dhe tendenca është që Sistemi i Drejtësi të përfundoj në duart e Sigurimsave të Enverit. Nëse Alimadhi dhe Roshi e kanë për nderë të jenë pjesë e një Parlamenti që do të zbatoj Reforma në shërbim të krimit, askush nuk mund ti ndalë më shumë se trashëgimia dhe vlera kombëtare që ka Balli.

10.Luftojmë për mobilizimin e të gjitha fuqive të gjalla të Kombit, kundra pushtuesit, për realizimin e idealit të lartë kombëtar.

Kjo është ajo që i duhet sot kombit, mobilizimi i fuqive të gjalla të Kombit, që sot janë jashtë Parlamentit, dhe jo aty, ku me urdhër të Edi Ramës u futën, Adriatik Alimadhi dhe Artur Roshi. Realizimi i idealit të lartë kombëtar do të bëhet edhe pa Alimadhin dhe Roshin, por shumë prej atyre që vazhdojnë ta ushqejnë këtë ideal për të vetmin fakt se kanë një trashëgimi të tillë, do të vazhdojnë ta kenë të qartë se kush është pushtuesi, sepse të qenurit pjesëtarë i Ballit Kombëtar, nuk është vetëm të luftosh dhe respektosh këto 10 pika, sepse para së gjithash duhet ta kesh parasysh: Shqipëria Shqiptarëvet!