Ballkani i Hapur, çfarë halli ka Edi Rama: Nuk rrimë dot të presim…
Kryeministri Edi Rama me vëllaun e tij të deklaruar, Presidentin e Serbisë, Aleksandar Vuçiç, krijoi Mini Shengenin dhe nuk e mbështeti njeri, e ripagëzuan Ballkan i ri e përqeshën dhe së fundi as emri i ri “Open Balkan” nuk ngjiti te asnjëri prej liderëve ballkanik përveç Kryeministrit të Maqedonisë së Veriut, Zoran Zaev të cilin si proserb që është po e tërheqin zvarr nga Novi Sadi në Ohër sa herë i duhet Vuçiçit përkatësisht Ramës.
Nuk dihet çfarë halli ka vërtetë Edi Rama kur asnjëra nga Marrëveshjet me Serbinë nuk i funskionon, dhe as kjo së fundi për fatkeqësitë natyrore ku Vuçiçi firmos marrëveshje me Ramën dhe ndihmon Micotakisin me zjarret, e Kryeministri i Shqipërisë shfaqet në rrjetin social Twitter duke theksuar se qeveria gjermane e mbështet nismën “Ballkani i Hapur” dhe kërkon nënshkrimin urgjent të marrëveshjeve për Tregun e Përbashkët Rajonal para Samitit BE-Ballkan më 6 tetor.
“ÇUDI”! Qeveria gjermane e mbështetka Open Balkan ndryshe nga çfarë u thuhet njerëzve në Prishtinë e Tiranë prej atyre që s’pyesin për Amerikën dhe jo vetëm kaq, po kërkon nënshkrimin urgjent të marrëveshjeve për Tregun e Përbashkët Rajonal para Samitit BE-Ballkan në 6 tetor!,” thekson Edi Rama përmes rrjetit social Twitter pa asnjë përgjigje mbi arsyet pse kjo nismë kundërshtohet jo vetëm nga Prishtina por dhe nga Sarajeva e Podgorica që kanë shumë pikëpyetje. Por kjo nuk i pengon Edi Ramës që të vazhdojë:
“Open Balkan thotë qeveria gjermane duhet të jetë gjithëpërfshirës dhe po, patjetër, kështu duhet të jetë e ndaj dera është e hapur, por as nuk përfshijmë dot kënd me zor, as nuk rrimë dot të presim sa t’u mbushet mendja atyre që s’duan të kuptojnë se kjo është rruga e të ardhmes!”
Ndryshe, ideja e Mini Shengenit ballkanik, u prezantua në qytetin serb Novi Sad më 10 tetor 2019, nga liderët e Serbisë, Maqedonisë së Veriut dhe Shqipërisë. Ndonëse Edi Rama në rrjetin social gërthiste se është ide e tij dhe rruga e vetme e heqjes së kufirit të Shqipërisë me Kosovën, në një dalje zyrtare publike në Beograd, Presidenti i Serbisë, Aleksandar Vuçiç, sqaroi se kjo ishte ide e tij, dhe renditi arsyet e Marrëveshjes shumicën prej të cilave i ka firmosur në kuadër të Dialogut Kosovë-Serbi dhe nuk i respekton.
Gjithsesi koha me ndihmën e Edi Ramës dhe Zoran Zaevit punuan për Serbinë dhe më 29 Korrik ata nënshkruan në Shkup marrëveshjen me të cilën thanë se synojnë të heqin kontrollet në kufijtë e tyre për mallrat dhe qarkullimin e njerëzve, duke filluar nga 1 janari 2023 dhe e pagëzuan “Open Balkan”.
Pse nuk firmosi Bosnje Hercegovina dhe Mali i Zi nuk u irritua Edi Rama ama u zbraz mbi Kryeministrin e Kosovës, Albin Kurti të cilin kishte menduar se e ka lolo në xhepin e tij të vogël!
“Kush thotë që kjo është një nismë e projektuar në bodrumet e ish-Jugosllavisë, jeton në një botë tjetër. E para, jeton në një botë paralele. E dyta, jeton për politikë në lëkurën e njerëzve dhe jo për rritjen e mirëqenies dhe për forcimin e urave mes njerëzve dhe e treta, harron se po të nisemi kështu, atëherë duhet të themi se edhe Bashkimi Evropian është një Jugosllavi e madhe. Nëse BE është Jugosllavi e madhe, kjo është Jugosllavi e vogël”, tha Rama në Shkup, ison e të cilit e mbajti Presidenti i Serbisë, Aleksandër Vuҫiç duke thënë se Edi Rama po bën punë të mirë, ndërsa, kryeministri Kosovar po gabon!
