“Balluku” në Kushtetuese, Kolegji plotësohet me Marsida Xhaerllarin si Kryetare në detyrë
Me plotësimin e Kolegjit në Gjykatë Kushtetuese me Marsida Xhaferllarin si kryetare në detyrë pas largimit të Holta Zaçajt, tashmë pritet nëse do të kalojë ose jo për shqyrtim kërkesën e qeverisë për çështjen “Balluku”.
Këshilli i Ministrave ankimoi vendimin e Gjykatës së Posaçme për pezullimin nga detyra të Zv/Kryeministres dhe ministres të Infrastrukturës dhe Energjisë, Belinda Balluku, pasi sipas Edi Ramës GJKKO ka ndërhyrë në kompetencat e tre organeve të shtetit: Kryeministrit, Presidentit dhe Parlamentit!
Dhe jo vetëm kaq! Edi Rama vlerëson se me pezullimin nga detyra të Belinda Ballukut ka ndodhë hataja, e për Shqipërinë edhe fundi i botës.
“Pezullimi sjell pasoja të rënda të interesit shtetëror e shoqëror duke krijuar vakuum institucional pasi pamundëson propozimin e projekteve me rëndësi kombëtare për integrimin në Bashkimin Evropian, rreth 800 projekte për tu miratuar deri në fund të 2027 nga ministria që udhëhiqet nga ministri, i cili është pezulluar nëpërmjet vendimit të GJKKO-së,” thekson në arsyetim Këshilli i Ministrave i cili drejtohet nga Edi Rama, dhe i cili edhe 12 vjet pas qeverisjes nuk e ka kuptuar se jo pa Belindën por edhe por pa Kryeministrin Rama ky vend jo vetëm që do të funskionojë, por do të funskionoj shumë më mirë.
Në Kolegjin Penal i cili pritet të mblidhet javën e ardhshme, mësohet se relator është Sandër Beci.
Ndryshe, Gjykata e Posaçme pezulloi nga detyra Zv/kryeministren dhe ministren e Infrastrukturës dhe Energjisë, Belinda Balluku, duke i ndaluar gjithashtu të drejtën për të dalë jashtë vendit.
Belinda Balluku është marrë pandehur për procedurat në tenderin e tunelit të Llogorasë dhe është nën hetim për tenderin e lotit 4 të Unazës së Madhe. Në të dy rastet dyshohet se fituesi është paracaktuar. SPAK ka bërë të ditur se po heton dhe një sërë procedurash të tjera prokurimi.
