Banane me drogë edhe në Mal të Zi, kapen rreth 400 kilogram kokainë
Policia e Malit të Zi ka zbuluar sot rreth 400 kilogram kokainë në depon e kompanisë “Voli”. Lajmi është konfirmuar për televizionin publik RTCG nga Drejtoria e Policisë Malit Zi.
Sot policia malazeze ka bërë një kontroll nëse punëtorët e komanisë “Voli” kanë gjetur në depo drogë. Pas denoncimit të drejtorisë dhe punëtorëve të kompanisë, është inicuar një hetim ndërsa inspektorët kanë marrë deklaratat nga punëtorët prezent.
Policia e Malit Zi nuk i ka dhënë një deklaratë zyrtare në lidhje me rastin Televizionit publik, RTCG, ndërsa nga kompania “Voli” theksuan se nuk do të shprehen për momentin. Prokuroria Speciale e Malit Zi po merret me rastin dhe pritet të vendoset se kush do të jenë personat e arrestuar.
RTCG raporton se në vendin e ngjarjes inspektorët kanë marrë në pyetje punëtorët prezent lidhur me ngjarjen ndërkohë të punësuarëve u është ndaluar kthimi në depo deri në përfundim të hetimeve.
Partia politike “Prava Crna Gora” ka publikuar fotografi të cilat janë realizuar nga punëtorët e kompanisë “Voli”, pasi me zbulimin e një pluhuri të bardhë në paketat me banane dyshuan se bëhet fjalë për një substancë narkotike, sipas tyre, kokainë.
“Prava Crna Gora”, përmes rrjetit social Facebook i bëri thirrje organeve kompetente që urgjentisht të reagojnë.
Në fotografitë e publikuara nga “Prava Crna Gora”, paketat me banane, ku është gjetur substanca e dyshimt, janë të brendit të njohur “Derbi”, nga Ekuadori.
Ndryshe, kohë më parë Televizioni publik i Malit të Zi, RTCG, duke ju referuar portalit “Primicias” ka raportuar se në vitet e fundit Ekuadori është bërë një enklavë e sigurt për veprimin e kontrabandistëve evropianë të drogës, në veçanti shqiptarëve, malazezëve, spanjollëve, holandezëve dhe belgëve.
Në periudhën prej vitit 2017 deri në vitin 2021, sipas raporteve të migrimit, në Ekuador janë futur 3.111 grekë, 1.053 bjellorusë, 721 shqiptarë dhe 192 malazezë. Sipas portalit “Primicias” vlerësohet se 30 për qind e tyre vijnë për shkak të kontrabandës së drogës dhe janë vendosur në zona të mbyllura të portit Guajakila.
