Banka e Anglisë paralajmëron recesionin më të thellë në histori

Banka e Anglisë ka paralajmëruar se pandemia e koronavirusit do ta shtyjë ekonominë e Mbretërisë së Bashkuar drejt recesionit më të thellë në histori. Ekonomia, tha ajo, pritet të tkurret për 14 për qind këtë vit, nëse masat e izolimit lehtësohen në qershor.

Skenarët e krijuar nga kjo Bankë kanë treguar se COVID-19, ka ndikuar në mënyrë dramatike në zvogëlimin e vendeve të punës dhe të ardhurave në Mbretërinë e Bashkuar.

Politikëbërësit kanë miratuar njëzëri mbajtjen e shkallës së interesit në nivel rekord të ulët prej 0.1 për qind.

Analiza e Bankës së Anglisë, raporton RFE, është bazuar në lehtësimin e masave të distancimit fizik nga qershori në shtator.

Mbretëria e Bashkuar është vendi i prekur më së keqi në Evropë nga koronavirusi.

Në këtë territor janë regjistruar mbi 200,000 persona të infektuar dhe mbi 30.000 të vdekur nga COVID-19, që shkakton koronavirusi.