Bankat shqiptare po rriten në tregun e Kosovës, arrijnë në 16.9%
Kosova mbetet i vetmi treg i jashtëm ku sektori bankar shqiptar ka arritur të vendosë një prani të qëndrueshme.
Të dhënat nga Shoqata e Bankave të Kosovës tregojnë se pjesa e tregut të dy bankave me kapital mbizotërues shqiptar ka vazhduar të rritet në vitin e fundit.
Në fund të tremujorit të parë 2023, Banka Kombëtare Tregtare Kosovë dhe Banka Credins Kosovë zotëronin 16.9% të tregut bankar në Kosovë, për një total të përbashkët aktivesh prej afërsisht 1.1 miliardë eurosh. Pjesa e tregut e bankave shqiptare në rritje të ndjeshme nga niveli prej 15% i të njëjtës periudhë të një viti më parë.
BKT Kosovë po vazhdon të fitojë terren me ritme të shpejta dhe në fund të tremujorit të parë të këtij viti u bë banka e tretë më e madhe në Kosovë, duke kaluar për herë të parë ProCredit Bank Kosovë. Totali i aktiveve të BKT arriti në 1.032 miliardë euro ose 15.9% të tregut.
Pjesa e tregut të BKT Kosovë është rritur me 1.3 pikë përqindje në harkun e 12 muajve të fundit. BKT hyri në tregun Kosovar në vitin 2007, duke nisur fillimisht operacionet si degë e bankës mëmë në Shqipëri.
Pasi në vitin 2018 BKT-Kosovë kaloi kufirin e 10% të tregut bankar në Kosovë, që nga fillimi i vitit 2019 ajo u transformua në një bankë të veçantë, me aksionar të vetëm Bankën Kombëtare Tregtare.
Banka e dytë shqiptare në tregun Kosovar, Credins Bank, e nisi aktivitetin në një moment delikat, gjatë vitit pandemik 2020. Në fund të tremujorit të parë të këtij viti, totali i aktiveve të bankës në pothuajse 64 milionë euro.
Credins mban ende një pjesë të vogël tregu, me vetëm 1% të totalit, por kjo pjesë është rritur ndjeshëm me 0.4 pikë përqindje në 12 muajt e fundit. Banka Credins Kosovë kontrollohet në masën 66.35% të aksioneve nga Banka Credins Shqipëri, ndërsa pjesa e mbetur e aksioneve zotërohet nga disa sipërmarrës të tjerë shqiptarë dhe kosovarë.
Tregu bankar në Kosovë ka aktualisht 11 banka të licencuara. Raiffeisen Bank Kosovë kryeson tregun me 20.1% të aktiveve, e ndjekur nga NLB Bank me 16.9% dhe BKT Kosovë, me 15.9%.
Tregu Kosovar në vitet e fundit ka qenë i lakmuar për institucionet financiare shqiptare. Ky treg karakterizohet nga një rritje e shpejtë, nivele të ulëta të kredive me probleme dhe përfitueshmëri ndjeshëm më e lartë krahasuar me tregun bankar në Shqipëri.
Për vitin e kaluar, kthimi mesatar nga kapitali rezultoi në nivelin 16.7%, nga 14.2% që ishte i njëjti tregues për sektorin bankar në Shqipëri. Raporti i kredive me probleme, në fund të tremujorit të parë të këtij viti ishte në nivelin 2%, ndërsa në Shqipëri ky tregues për të njëjtën periudhë ishte 5.15%.
Përveç BKT dhe Credins Bank, edhe Tirana Bank ka qenë e interesuar për të hyrë në tregun Kosovar dhe vitin e kaluar negocioi blerjen e bankës së pestë më të madhe në Kosovë, TEB, por negociatat u mbyllën pa sukses.
Një tjetër subjekt shqiptar që pritet të nisë së shpejti aktivitetin në Kosovë është institucioni financiar jobankë i kredidhënies, NOA. Filiali Kosovar, i kontrolluar në masën 60% nga NOA sh.a., është licencuar nga Banka Qendrore e Kosovës dhe do të nisë operacionet gjatë muajve në vazhdim./Monitor/
