Banorët e dhunuar/ Prova, Balliu në Prokurori: Ja si dhunoi Shefi i Komisariatit Nr.4

Ish-deputeti i Partisë Demokratike, Klevis  Balliu, pasi dorëzoi disa prova në Prokurori për dhunën e policisë ndaj banorëve te Bregu i Lumit, tha se policia është përqëndruar drejt dhunimit të protestuesve dhe jo të bandave të krimit.

“Sot armiku i policisë për shkak të Edi Ramës, dhe kupolës së inkrimunuar dhe të dehur të policisë së Shtetit, është qytetari shqiptar. Jetojmë në kohë të vështira, është krizë dramatike, politike dhe ekonomike. Dhunë si e keni parë te Bulevardi ka qenë e papranueshme por nuk kemi asnjë të shoqëruar,” tha Klevis Balliu duke bërë të ditur se ka depozituar prova rreth dhunës së policisë ndaj një 20 vjeçareje dhe Shefi i Komisaritatit që dhunoi vajzën, vazhdon të jetë në punë:

“Sot, vazhdon akoma në punë Shef i Komisariatit Nr.4, i cili është filmuar duke dhunuar  një 20-vjeçare Manjola Mandri, videon e së cilës e dorëzova sot.”

Në këtë situatë të paligjshmërisë kur qytetari shqiptar është armiku i policisë për shkak të Edi Ramës, Ish-deputeti i Partisë Demokratike, Klevis  Balliu, thekson se ka ngelur vetëm një rrugë:

“Nuk ka asnjë rrugë tjetër, veç revoltës mbarëkombëtare që të kthejë normalitetin në këtë vend. Ne me çdo mjet do i dalim në mbrojtje qytetarëve që dhunohen nga policia.”