Gazment Bardhi propozon emrat e Komisionit të Reformës Zgjedhore, PS rrëzon kërkesën

Mazhoranca sot ka hedhur poshtë kërkesën e Kryetarit të Grupit Parlamentar të PD-së, Gazment Bardhi, për të votuar në seancë përbërjen e Komisionit të Reformës Zgjedhore, me arsyetimin nga Kryetari i Grupit Parlamentar të PS-së, Bledi Çuçi, se sot Parlamenti duhet të votojë vetëm shtyrjen e afatit të Komisionit dhe në seancën tjetër përbërjen. 

Ndryshe, Gazmend Bardhi i është drejtuar me një kërkesë Kryetares së Parlamentit, për të futur në rendin e ditës ndryshimin e përbërjes së Komisionit Parlamentar për reformën zgjedhore.

Kërkesën ai e argumenton me faktin se ndryshimi i përbërjes së Komisionit vjen si domosdoshmëri, pasi puna në atë komision ka qenë joefiçiente dhe në përbërje ka emra të cilët e kanë dorëzuar mandatin e deputetit.

“Për një vit e gjashtë muaj, janë zhvilluar vetëm dy mbledhje, duke bllokuar çuarjen përpara të kësaj reforme të rëndësishme për vendin,” thuhet në kërkesë.

Gazmend Bardhi propozon bashkëkryetar të Komisionit për Reformën Zgjedhore, Oerd Bylykbashin, ndërsa si anëtarë deputetët Dhurata Çupi, Dashnor Sula, Ervin Saljanji, Lindita Metaliaj, Tomor Alizoti, Fatmir Mediu, Shpetim Idrizi dhe Petrit Vasili.