Basha denoncon vjedhjen me inceneratorë, Rama flet për marrëdhënie fiziologjike!

Pasi Kryetari i Partisë Demokratike, Lulzim Basha, denoncoi skandalin me Milva Ikonomi e cila pritet të komandohet në krye të Bashkisë Durrës për të firmosur vjedhjen me inceneratorët, ka reaguar Kryeministri Edi Rama duke e akuzuar Partinë Demokratike se ka një marrëdhënie fiziologjike me kaosin urban dhe mbeturinat:

“Lulëzim, unë e di që Partia Demokratike ka një marrëdhënie fiziologjike me kaosin urban dhe mbeturinat, jo vetëm sepse një mbeturinë të komunizmit dhe një rrëmujaxhi patologjik e ka lider prej 30 vjetësh, po edhe sepse kurdo e kudo ka qeverisur plehrat i ka pasur male krenare!” tha Edi Rama në reagimin e tij përmes rrjetit social Twitter duke e bërër të qartë se nuk do të ndalet:

“Por do ti s’do ti, doni ju s’doni ju, Shqipëria e Rilindjes Urbane dhe e fushave sanitare të përpunimit teknologjik të mbetjeve nuk do të ndalet deri kur në asnjë cep të shtëpisë sonë të përbashkët të mos digjen e mos kalben plehra, sepse mesjeta juaj ka vdekur e s’kthehet më!”

Në ekzaltim e sipër, Edi Rama në rrjetet sociale ka shumë më shumë inspirim se sa kur drejton qeverinë, dhe akuzave për vjedhjen e 75 milionë eurove i përgjigjet me ese sociale:

“Prandaj Lulëzim hiq dorë nga nostalgjia për mbeturinat që ke mbi krye e mbi supe dhe harroje se duke sharë,akuzuar,shpifur do ta kthesh Tiranën, Durrësin, Elbasanin, Fierin e Shqipërinë, në epokën e vargmaleve të turpshme me plehra në emër të popullit që mezi të pret në 25 prill!”

Ndryshe, sot Kryetari i Partisë Demokratike, Lulzim Basha, gjatë një bashkëbisedimi me gazetarët sqaroi se për inceneratorët Edi Rama e ka në mendje ta shkarkojë për herë të pestë apo të gjashtë kryetaren e bashkisë së Durrësit sepse ajo nuk pranon të firmosë një aferë qindra milionëshe për të çuar lekë tek inceneratori i Tiranës.

“Dhe po bëjnë gati Milva Ikonomin që të japë dorëheqjen nga deputete e të komandohet atje që të firmosi shkresën e të vjedhin paratë prapë me inceneratorët. Këtu e ka mendjen ai, mos kujtoni se ka mendjen diku tjetër. Keni besoj informacion? Ja po ua them unë. Ky është plani. A do ta ndryshojë pas publikimit që bëra unë? Kjo mbetet për tu parë. Plani është: Milva Ikonomi të japë dorëheqjen nga deputete, të komandohet nënkryetare, të ikë kjo nënkryetarja e 3, 4 apo 5-të atje dhe të firmosi shkresën për të çuar të paktën 100 milionë inceneratorëve,” tha Lulzim Basha duke shtuar se gjithçka tek Edi Rama është e lidhur me paratë që iu grabitën shqiptarëve dhe iu shkojnë oligarkëve, në veçanti afera e tmerrshme e inceneratorëve të plehrave ndërsa përfundoi:

“Të tjerat pastaj janë pikërisht siç e thash dhe siç më citove : “Fryhet si gjel dhe kakaris si pulë”. Por pulë që s’bën vezë, bën vetëm glasa. Dhe faturën e paguajnë shqiptarët.”