Basha i përgjigjet Vlahutin: Problemi nuk është a puthem me Ramën, por lidhjet e krimit me qeverinë

Kryetari i PD, Lulzim Basha, i ka kthyer përgjigje të distancë ambasadores së BE-së në Tiranë, Romana Vlahutin, e cila gjatë ditës së sotme, i kërkoi Kryeministrit Edi Rama që të shtrijë dorën e bashkëpunimit drejt opozitës. Vlahutin paralajmëroi një vit të vështirë, ndërsa e konsideroi të pamundur realizimin e integrimit pa një bashkëpunim real mes qeverisë dhe opozitës.

“Më vjen shumë keq që edhe sot ka pasur një investim donkishotesk edhe nga nga ndonjë i huaj që flet për çdo gjë përveçse për problemin. Problemi këtu nuk është komunikimi opozitë-qeveri, nuk është përballja opozitë-qeveri, problemi është lidhja e qeverisë me krimin, problemi është kapja e drejtësisë nga qeveria, problemi është ekonomia.

Nëqoftë se do vazhdojmë të kemi Ministra të Brendshëm të lidhur me krimin, kryeministër që bën ligje të posaçme për të grabitur pronën publike, teatrin, që të pastrojë lekët e ‘Yaris’ me kullat. Nëse do vazhdojmë të kemi një drejtësi që nuk ndëshkon politikanët e lidhur me krimin por i mbron ata, që merret me justifikimin e krimit.

Ata që bëjnë leksione, jo bashkëpunimi, jo puthuni. Janë aut fare, ju ka mbaruar koha. Partia Demokratike nuk bashkëpunon me qeverinë e krimit dhe drogës. PD e ka bërë punën e saj për hapjen e negociatave, duke parë të vërtetat në sy, duke ju thënë europianëve kështu është siç thoni ju, por pikërisht se është kështu na duhet ndihma juaj dhe hapja e negociatave do të ishte një ndihmë shtesë për ti mbajtur përgjegjës.

Por nuk mjaftoi as kërkesa jonë dhe as aspirata e gjithë shqiptarëve. As një vendi nuk i janë hapur negociatat në këto kushte ku është Shqipëria sot. Detyra jonë e parë është të çlirojmë politikën nga krimi dhe kjo nuk vjen duke i dhënë falje Edi Ramë por duke i treguar Edi Ramës dhe qeverisë së tij të lidhur me krimin derën, duke e larguar këtë qeveri. Vetëm kjo na çon tek hapja e negociatave”, tha Basha.