Basha: Në Europë nuk shkohet si klloun me poture dhe atlete

Kryetari i Partisë Demokratike, Lulzim Basha, tha nga salla e Kuvendit se në Europë nuk mund të shkohet me poture dhe atlete, ndërsa shtoi se edhe largimi i Edi Ramës nuk mjafton.

“Mundësia jonë e vetme është ta largojmë sa më parë, na pret një detyrë e madhe, nuk shkohet në Evrope si klloun me atlete e poture, duke vjedhur popullin me tabiate orientale dhe njëherë në muaj duke bredhur në kryeqytete e duke folur si evropian, se e dinë që ky është vetëm një despot oriental, largimi i tij nuk është zgjidhje, pa largimin e tij nuk ka zgjidhje, por na lypset përqasje evropiane, sjellje evropiane ndërtuar mbi të vërteten, transparencën.

Jo errësirën si ajo që shoqëron çdo vendim si grabitja për Teatrin Kombëtar, si vendimi i fundit makut i klikës hajdute në pushtet. Pa përqafuar vlerat evropiane, Evropa vetëm do të na largohet”, theksoi Basha.

Sipas tij, sot është dita ta themi qartë dhe hapur se Edi Rama dhe qeveria e tij me aktin e djeshëm ka falimentuar në çdo aspekt. Basha theksoi se Rama është i vetmi kryeministër në 28 viet që nuk ka asnjë arritje të vetme sa i përket integrimit europian të Shqipërisë.

“Tani duhet të presim dhjetorin e vitit 2019 dhe kjo vetëm nëse përsëri i plotësojmë kushtet. Ky nuk është lajmi më i keq, shtyrja deri në dhjetor të 2019-ës. Lajmi më i keq është nëse nuk e ndërrojmë këtë qeveri, rezultati do të jetë i njëjtë.

Prapë do të mblidhemi në këtë sallë me Kim Um Jungun që do të bërtasë fitore, bashkë me teveqelët e tij dhe me një Shqipëri akoma më të varfër, akoma më të padrejtë, akoma më të zbrazur. Ndaj sot ëhstë dita ta themi qartë e hapur se Edi Rama dhe qeveria e tij me aktin e tij të djeshëm ka falimentuar në çdo aspekt”, tha ai.