Basha në PPE, mbështetje për hapjen e negociatave

Kryetari i Partisë Demokratike, Lulzim Basha, në Asamblenë Politike të Partisë Popullore Europiane, PPE, në Bruksel, ka kërkuar mbështetje për hapjen e negociatave për Shqipërinë si një aspiratë e shqiptarëve, por edhe si garanci për të ndërtuar në Shqipëri një shtet demokratik, me pushtete të ndara, ku të garantohet vota e lirë.

“Hapja e negociatave është e rëndësishme, pasi do të sjellë një mbikqyrje të shtuar nga BE për të ndihmuar në ndarjen e politikës nga krimi, i cili sot ka kapur shtetin dhe për të penguar kandidimin e personave me rekorde kriminale, siç demonstrojnë rasti i Shkodrës dhe Vorës, ku është provuar tashmë se dy të inkriminuar u caktuan të kandidonin për bashkitë,” tha Basha në takim me përfaqësues të partive anëtare të PPE, drejtues të politikës së jashtme dhe të zgjerimit në Parlamentin dhe Komisionin Europian, si dhe Parlamentet e vendeve anëtare.

Shqipëria sot ka një krizë të thellë politike, institucionale dhe ekonomike. Zgjidhja, theksoi Basha, janë zgjedhjet e lira dhe të ndershme, të mbikqyrura nga një qeveri tranzitore.

Ndryshe, Asambeleja Politike e PPE-së nesër vazhdon punimet me diskutimin e sfidave me të cilat përballet Evropa aktualisht dhe përgatitjet për Kongresin e PPE-së, i cili këtë vit mbahet në Zagreb.