Basha në Shkodër/ Akti i parë i qeverisë PD, anulimi i Ligjit për Arsimin e Lartë

Kryetari i Partisë Demokratike, Lulzim Basha në takim me të rinjtë në Shkodër bëri të ditur se dje Grupi Parlamentar i PD ka vendosur që akti i parë i qeverisë së PD do të jetë anulimi i Ligjit për Arsimin e Lartë ndërsa sqaroi gjimnazistët shkodranë që së shpejti do të jenë pjesë e një Universiteti:

“Dje kemi marrë një vendim me Grupin Parlamentar të Partisë Demokratike. Kur Ligji kaloi ne e kundërshtuam në Parlament. Ne e konsiderojmë këtë ligj, rrënjën e së keqes, që ka zaptuar universitetet, rrënjën e të keqes nga e cila po vuajnë studentët shqiptarë. Me këtë ligj korruptiv nuk bëhet gjë tjetër veçse thellohet politika e vetme e Edi Ramës, merri shumicës, jepi pakicës. Në këtë rast vjedhja bëhet edhe më e dhimbshme, sepse tarifa për bachelor dhe master në Shqipëri, është më i larti në Evropë,” tha Basha ndërsa e pranoi se cilësia është me dobëta në Evropë, nga më e dobëta në botë dhe shtoi:

“Jeta universitare kontrollohet nga një grusht njerëzish për interesa politike dhe korruptive financiare. Anulimi i Ligjit për Arsimin e Lartë do të jetë akti i parë që qeveria e Partisë Demokratike do të ndërmarrë. Por kjo nuk mjafton. Ne duhet të nisim tani punën për hartimin e një ligji të arsimit të lartë, të standardeve dhe parimeve evropiane.”

Dhe jo vetëm kaq! Lulzim Basha me këtë rast bëri të ditur se dje, gjithashtu, Grupi Parlamentar ka vendosur për të ngritur një Grup Pune pranë PD për hartimin e një ligji të standardeve evropiane dhe   

“Në këtë grup pune do të jenë deputetë që mbulojnë fushën e arsimit, përfshirë edhe pedagogë, ekspertë të fushës nga Partia Demokratike, kemi skuadrën më të mirë të ekspertëve për arsimin. Do të nisim menjëherë konsultimin me dy grupe kryesore të interesit, me studentët dhe me pedagogët.”

 Fondet për të mbështetur studentët ekzistojnë, por këtë vit do i jepen miliona dollarë Vilma Nushit, Arben Ahmetaj, luksit qeveritar, tha kryetari i Partisë Demokratike duke shpalosur edhe zgjidhjen që ofron Partia Demokratike:

“Ligj për arsimin me standarde evropiane do të thotë, transparencë në cilësinë e mësimdhënies, do të thotë me mbështetje me fonde publike siç e kërkon Kushtetuta e Shqipërisë, institucionet e Arsimit të Lartë, të cilat janë publike, siç është Universiteti i Shkodrës, dhe fondet për të mbështetur këta studentë ekzistojnë por vullneti i mbrapshtë i kësaj qeverie dhe i këtij kryeministri, në vend që këto fonde t’i çojë për uljen e tarifave, në vend që t’i çojë për përmirësimin e kushteve të konvikteve dhe në tërësi kushteve të studentëve, në vend që t’i çojë në përmirësimin e auditorëve ia ka dorëzuar 4-5 njerëzve përmes kontratave korruptive. Ia kam thënë edhe në Parlament. Hiqja kontratat Vilma Nushit dhe 2 të tjerëve që do të marrin 32 milionë euro këtë vit, hiqi kontratat e tre inceneratorëve të Arben Ahmetaj me shokë, 21 milionë dollarë, hiq 18 milionë dollarë që i ka rezervuar për shpenzime shtesë luksi për qeverinë, hiq 11 milionë euro për zyra, orendi, makina të reja, për kryeministrin e ministrat, dhe ku ke para për dyfishimin e buxhetit për arsimin e lartë,” tha kryetari i Partisë Demokratike, Lulzim Basha, para të rinjve shkodranë duke përsëritur edhe rrugën se si do t’i përdoren këto para:

“Duke zeruar tarifat për bachelor dhe master për të gjithë familjet nën 640 mijë lek me tyë ardhura në muaj. Përgjysmim për të familjet me të ardhura mbi 640 mijë lek në muaj. Duke mbështetur 5 mijë studentë që vijnë nga nevoja ekstreme ekonomike me bursa deri në 2 milionë e 200 mijë lek të vjetra në vit, për qira, ushqim, librat dhe shpenzime të tjera të jetës studentore. Me gjithë këtë reduktim, mbeten ende para për të investuar çdo vit 32 milionë dollarë në kampuset universitare, auditorë, laboratorë, teknologji të informacionit, në përmirësimin e cilësisë së mësimdhënies, në tërheqjen e pedagogëve më cilësorë, në sjelljen e pedagogëve të huaj.”