Basha u ble me marrëveshjen mafioze të Portit, Berisha: Çdo kandidat i Alibeajt është i Ramës

 Për Ish-Kryetarin e PD, Lulzim Basha, Kryetari i Partisë Demokratike, Sali Berisha, sot tha se është i lidhur me Kryeministrin Edi Rama në marrëveshjen mafioze të Portit të Durrësit ndërsa lidhur me kandidaturat e grupit të tij për zgjedhjet lokale, Berisha ishte i prerë se çdo kandidat që del nga Enkelejd Alibeaj në zgjedhje, është kandidat i Edi Ramës.

“Çdo kandidat që del, gjoja, është në emër të Edi Ramës. Kjo është shumë e qartë, ne e kemi përcaktuar Edi Ramën si armikun numër një të PD-së, si njeriun që kërkon të zhdukë opozitën dhe PD-në, por si njeriu që do marrë përgjigjen më ndëshkuese për këto veprime, pasi PD është në të drejtën morale dhe kushtetuese për të qenë opozitë e pavarur,” tha Sali Berisha ndërsa për bashkëpunimin e këtij grupi me Portin e Durrësit shtoi:

“Ju e shihni sot, përfytyroni për një moment, kjo marrëveshje ishte për tragjedinë e Shqipërisë, marrëveshje opozitë-pozitë, por jo si formacione politike, por si persona hajdutë. Klani Rama dhe klani Basha, kjo është e faktuar. Ai që ishte, se ka njerëz që më thonë pse e thua, se e them për të vërtetën, se ai ishte administrator i Simfonisë, ishte administrator edhe i Ramës, edhe i Bashës.

Mos të kujtojë kush se po bëj akuzë politike, por po them të vërtetën e hidhur. Ky njeri tha se dha dorëheqjen nga ndërmarrja e Bashës dhe jo nga Simfonia. Por pas një muaji rezultoi se ishte sërish te të dyja. Pra, kjo ishte pika e mjaltit. Kjo do ishte e tmerrshme, opozita e blerë me marrëveshjen mafioze të Portit të Durrësit,” tha Kryetari i PD, Sali Berisha.

Ndryshe, dje me përfundimin e Kryesisë së PD kur KOKOE publikoi emrat edhe për 12 bashki për Primare, deputetët mbështetës të Lulzim Bashës, paralajmëruan që javën e ardhshme do të publikojnë emrat e kandidatëve për zgjedhjet lokale të 14 Majit 2023.