Bashës nga “Foltorja” në Durrës, Berisha: Nëse ti nuk pyet, nuk je më kryetari i PD!
Pasi i bëri një eko qeverisë së dështuar të Edi Ramës që mori dhe mandatin e tretë, Ish-Presidenti Sali Berisha nga “Foltorja” e Durrësi foli dhe për njeriun që kishte përballë, Kryetarin e Partisë Demokratike, Lulzim Basha, për të cilin tha se është marrë peng nga Kryeministri Edi Rama.
“Ju kujtoj se vetëm në një vit u burgosën për çështje civile, si në asnjë vend të planetit, 38 mijë shqiptarë, sepse njeriu që sot rrëmbeu mandatin e tretë dëshmonte një pasion të shfrenuar për hekurat dhe burgun për qytetarët, duke shkelur në mënyrë flagrante liritë dhe të drejtat e tyre. Në 8 vite, shqiptarët zbritën nga vendi me rrogat mesatare më të larta në rajon, në vendin me rroga mesatare më të ulët në rajon, përfshi këtu edhe Kosovën. Në 8 vite, Shqipëria kaloi nga një rekord i zi, në një tjetër rekord të zi. Në 8 vite, në udhëtimin tonë drejt BE, ne mbetëm në vend numëro dhe dyert e këtij bashkimi largoheshin nga ne si një horizont që s’e kapim dot. Me të gjitha këto, përsëri ky njeri që vetëm javën e parë u paraqit në derën e Këshillit të Ministrave me një veturë që përveç sheikëve të naftës, nuk do ta pranonte njeri, ky njeri, i cili është shndërruar në sherrin e vërtetë të Ballkanit, bashkë me Vuçiç, dhe po e ndëshkojnë Shqipërinë me nismat e tyre, madje edhe rajonin, në procesin e BE, ky njeri merr mandatin e tretë, e rrëmben, fillon si askush tjetër në 30 vite, të qeverisë për 4 vite të tjera,” tha Sali Berisha parar demokratë durrsakë duke vazhduar me ndjesën si në “Foltoret” tjera ndërsa kryetarin e Partisë Demokratike, Lulzim Basha, e cilësoi një pengmarrës të partisë.
“Është e vërtetë që i kërkova Lulzim Bashës, dhe nuk mund ta mohojë kurrë, të japë dorëheqjen pas zgjedhjeve të 2017, sepse humbje të tillë nuk kishim njohur kurrë që nga 1997, por problemi është se nuk nisa procesin e duhur, që ai të merrte të gjitha përgjegjësitë për atë humbje të tmerrshme që pësuam më 2017.
Biem dakord këtu, se në këto zhvillime dramatike për ne shqiptarët, pjesën e vet të pamohueshme e ka opozita shqiptare, e cila në këto vite nuk arriti kurrë të organizojë aksionet, veprimet për t’i treguar vendin një qeverisjeje të tillë, por përkundrazi dështoi. Në këtë dështim Sali Berisha ka pjesën e tij të pamohueshme, ndaj jam këtu për t’iu kërkuar ndjesë dhe për të shpjeguar se cilat ishin gabimet e mia në këtë ecuri. Unë dhashë dorëheqje dhe nuk bëra gabim, isha i bindur se kur zgjedhjet humbën në mënyrë të qartë dhe zgjedhësit hedhin kontratën me ty, ti duhet t’i hapësh rrugën një tjetri, dhe unë këtë bëra. Jam përpjekur me gjithë forcën time të kontribuoj me këshilla, kur më janë kërkuar, të transmetoj eksperiencën time, sikundër ju jeni dëshmitarë se kam qëndruar nga mëngjesi në darkë, çdo ditë, çdo javë, çdo muaj e çdo vit, kundër rekordeve të zeza të qeverisë aktuale dhe Edi Ramës, kam mbrojtur interesat tuaja, të demokratëve, interesat publike të shqiptarëve, kam mbrojtur interesin kombëtar.
Gabimi im qëndron se në rast se unë me të vërtetë u tregova jashtëzakonisht i vëmendshëm në çështjet që rendita më sipër, unë u tregova i heshtur ndaj zhvillimeve brenda PD, ndaj shkelmimit të normave, të parimeve, të kësaj partie. Unë vërtet publikisht ngrita zërin kur në një listë të bërë pas mesnate u ekzekutuan politikisht njerëz që kishin 20 vite kontribute në PD, por unë nuk nisa procesin e përgjegjësisë për këtë akt,” tha lideri historik duke përsëritur se i kishte kërkuar Lulzim Bashës dorhëheqjen pas zgjedhjeve të 2017, sepse humbje të tillë nuk kishim njohur kurrë që nga 1997, por problemi është se nuk nisa procesin e duhur, që ai të merrte të gjitha përgjegjësitë për atë humbje të tmerrshme që pësuam më 2017.
“Unë çdo gjë i thoja atij në zyrën time, dhe i kam të dokumentuara gjërat, por nuk e bëja atë, sepse nuk kisha ndërmend kurrë të rikthehesha më. Isha i vendosur të qëndroja njëri prej, pa të drejtë kthimi. Dorëheqjen time e kisha konceptuar si një dorëheqje pa kthim, dhe nëse unë futesha në probleme të brendshme të PD, unë nuk mund të futesha pa një projekt. Kjo më pengonte mua. Por vjen një moment, kur gabimet, mangësitë, nuk mund të të pengojnë më, që të ngrihesh në lartësinë e kërkesave, pritshmërive, dhe të luftoj së bashku me ju për një PD më të bashkuar, më të fortë, më të hapur, që ecën e sigurt drejt fitores. Ndaj dhe unë nisa këtë foltore, dhe ua them me kënaqësinë më të madhe, se gjej sot të njëjtin entuziazëm, që këto foltore kanë pasur më 1991,” tha Sali Berisha para demokratëve të qytetit bregdetar të Durrësit, optimist që ka një vullnet të hekurt nga njerëz të idealeve, njerëzore e kombëtare, të ngrihen në këmbë për të shpëtuar PD dhe Shqipërinë.
“Foltorja nuk ka asgjë në përpjekjen e Sali Berishës për të mbrojtur dinjitetin e tij. Ju e dini se e kam mbrojtur atë dhe nuk kam asnjë vështirësi për ta mbrojtur. Foltorja ka një qëllim madhor, që kurrë ndonjëherë të mos mendojë kush të marrë peng këtë parti, t’iu marrë peng ju, të mos mund të vendosë në emrin tuaj, duke shkelmuar mbi ju. S’ka të bëjë kjo betejë asgjë midis meje dhe peng-kryetarit, ua jap fjalën e nderit, por kjo ka të bëjë se peng-kryetari, duke fyer mua, ju, çdo demokrat, del një ditë, nuk mund të them si i biri i Enverit, se ai i bënte më një procedurë, dhe ju thotë shqiptarëve ‘vendosa unë’, pa pyetur anëtarët, ju, këshillin,” tha lideri historik i Partisë Demokratike Sali Berisha duke i bërë të qartë demokratëve dhe Lulzim Bashës që nëse nuk pyet më për anëtarësinë, ti nuk je kryetari i kësaj force politike.
“Askush nuk mund të shkelmojë mbi ju, por ai është peng, dhe pengu nuk është kurrë vetja e tij, e ka humbur lirinë, dhe ju thotë juve atë që ja diktojnë padronët e tij. Kjo foltore nuk është kundër atyre që mendojnë ndryshe nga ne, nuk është kundër miqve dhe partnerëve tanë, por e kundërta, kjo foltore synon që ne të vendosim së bashku, që kjo parti të marrë vendimet si një parti sovrane, dhe sovraniteti i saj qëndron në mendimet tuaja. Nuk mund të fshihen këto nga një njeri që thotë ‘nuk pyes për këto’. Nëse ti nuk pyet, ti automatikisht nuk je më kryetari i kësaj force politike.”
Në fund, nga “Foltorja” e Durrësit Ish-Presidenti kishte dhe një paralajmërim për Kryeministrin Edi Rama:
“Të bëhemi ne shtojcë e Edi Ramës, e njeriut me rekorde më të zeza, i cili me mendësi atërore, mori përsipër duke marrë peng kryetarin, t’i fusë thikë pluralizmit në Shqipëri. Shqiptarët për pluralizmin kanë bërë sakrificë të jashtëzakonshme. Mijëra jetë të humbura, mijëra të tjerë në kampet e përqendrimit. Atëherë se çfarë je ti?! Shkuar Makbethit se merr peng një dhe kujton se do marrësh peng pluralizmi. Paralajmëroj Edi Ramën: mos luaj me fatet e pluralizmit, se do të presë fati i paraardhësve të tu. Rregullat janë rregulla. Kape peng një njeri dhe kujton se do të shkelmosh mbi 620 mijë shqiptarë që votuan kundër teje, pa llogaritur dhjetra mijëra të tjerë që iu rrëmbeve votën. Ku të çon mushka?! Në greminë po shkon. Ne jemi gati. Para se të merremi me pengun, do merremi dhe me padronin e tij. Përgjegjësia do të jetë më e madhe për të, se ndaj kujtdo tjetër,” tha lideri historik Sali Berisha duek ftuar të gjithë demokratët që të angazhohen në dialog, me të gjithë ata që kanë votuar për PD-në dhe të shpjegohen se çfarë po bëjmë ndërsa i prerë përfundoi:
“Do ta bëjmë këtë Kuvend për të sanksionuar norma dhe standarde për rolin tuaj. Duhet të jeni ju që do të zgjidhni me votën tuaj, këshilltarë, kryetar bashkie, deputetët tuaj. Këtë e kërkon maturia e demokracisë në 30 vite. Kjo është praktikë më e suksesshmja. Kuvendi që do të mbledhim do të sanksionojë se kurrë një kryetar nuk mund të grabis pushtetin e forumeve që keni votuar. Nëse ai e bën këtë, nuk është më kryetar. Do të mbledhim Kuvendin. Ne do të hartojmë platformën tonë, me të cilën do të pushtojmë mendjet dhe zemrat e shqiptarëve. Do të ecim të sigurt drejt fitores. U krijuam si opozitë me misionin historik për të përmbysur pushtetin. Ndërsa sot kërkojmë të përmbysim narkoshtetin. Çdo gjë do ta nisim nga vetja jonë, nga sanksionimin e vetes tonë. Ftoj delegatët e Kuvendit që të firmosin, pavarësisht se çfarë mendojnë, për njërin apo për tjetrin. Por të firmosin për të respektuar veten e tyre. Me këtë rast. Do bëj gjithçka që diaspora dhe emigracioni shqiptar të kenë hapësira që ato meritojnë që të kenë aksioner në zhvillimet në këtë vend. Diaspora në SHBA ka luajtur një rol të dorës së parë në problemet e lirisë së shqiptarëve. Në momentet kritike të Shqipërisë. Jam i vendosur që të bëhet gjithçka që ky rol të bëhet edhe më i madh. Për të përndjekurit politik jam i vetëdijshëm se fibra e tyre politike është atdhetare, e idealeve më të larta, njerëzore për të cilat PD ka nevojë jetike, si dhe shoqëria shqiptare.”
