Bashizmi kundër Berishizmit, mirazh jo dikotomi!
nga Agim Popoci
Pas Neritanizmit, Preçizmit, Pashkoizmit, Meksizmit e Pollizmit radha i erdhi Bashizmit, po me të njëjtin qëllim, shkatërrimin e opozitës ,dhe, arsyetimin, se po kundërshton Berishizmin!
Sikur të ngrinte koha, çdo akuzë për Berishizëm mund të ishte edhe e vërtetë por zhvillimi i ngjarjeve tregoi se Berishizmi ishte vetëm një mirazh në kokat e këtyre njerëzve të pakënaqur me zhvillimet politike në Partinë Demokratike; Ndërsa dikotominë ka demokratë që mund ta bëjnë edhe sot, por jo ky llum opozitar që hyri dhe doli si i tillë nga PD, duke zbritur nga kurrizi i demokratëve që në shumë kriza e mbajtën gjithë partinë e tyre të zemrës ndonëse ishin të pakënaqur se si drejtohej nga Sali Berisha në pushtet, por, jo edhe të gatshëm ti vënë kazmën!
Për të mos bërë histori meqë janë i njëjti llum, të hedhim një sy në “izmin” e fundit, Bashizmin i cili sërish i shitet demokratëve si një kundërshti e Berishizmit, i cili do ta shpëtoj Partinë Demokratike!
Pse Lulzim Basha me gjithë llumin që e mbështet është në Partinë Demokratike tregon që Berishizmi, për të cilin llomotitin këta analfabetë politik, nuk ekziston!
Ndryshe, Lulzim Basha mund të kishte fut hundët në KOP, pa asnjë ditë përvoje politike edhe të emërohej Koordinator, madje edhe deputet në emër të prurjes së re, por, pa asnjë ditë karriere politike në PD, kurrë nuk do të bëhej ministër i qeverisë së Partisë Demokratike!
Një analfabet politik që i hipë autobusit dhe vjen nga administrata e UNMIK-ut për tu bërë ministër shumë i rëndësishëm i qeverisë e cila erdhi në pushtet pas në beteje të ashpër politike shumëvjeçare me socialistët, mund të quhet idiotizëm ose idiotizëm i Sali Berishës, por, kjo nuk ka të bëjë me asnjë lloj Berishizmi në botë!
Dhe, kush e thotë, Lulzim Basha, një njeri që nuk ka vendosur kurrë për asnjë gjë në botë dhe vjen e hedh firmën për projektin shqiptar të shekullit, “Rrugën e Kombit”!
Ky “yll shpëtues” i Qeverisë Berisha, përveç ministrisë së Transportit drejtoi dhe ministritë e Brendshme dhe atë të Jashtme dhe nuk i pengoi “Berishizmi”, ashtu siç nuk i pengoi ky lloj strukturimi politik kur e emëroi në krye të Bashkisë Tiranë dhe së fundi vetë Partinë Demokratike!
Vjen dhe momenti kur Lulzim Basha me shokë shpërthejnë për të shfaqur pakënaqësitë për Sali Berishën duke e akuzuar për autoritar, me tesere komuniste, për trazirat e ’97-së, shpërthimin e Gërdecit, vrasjet e 21 Janarit dhe gjithë produktin e arsenalit propagandistik që kishte shkrepur Sigurimi i Shtetit, që i dedikohej Berishizmit ndër vite!
Të tillë janë dhe ata që i shkojnë pas! Imagjinoni gjithë banda e Genc Pollos që për Berishizëm u rebeluan, krijuan partinë e tyre dhe gjetën qeverisje ku “nuk ka Berishizëm”, Qeverinë socialiste të Fatos Nanos! Por kjo nuk i pengoi ti kthehen Berishizmit meqë erdhi Sali Berisha në pushtet, dhe na shfaqen sërish si restaurues të Partisë Demokratike pasi ai ra nga pushteti!
Sikur ky restaurim i Partisë Demokratike do ishte ndryshe ndoshta sot do të kishte kuptim, por gjithë përpjekja restauruese dyvjeçare e këtij llumi opozitar u përqendrua tek kritikat mbi lëvizjet politike opozitare që bënte Sali Berisha nga foltorja deri në zgjedhjet e 14 Majit si pjesë e listës së partisë së Ilir Metës, ndonëse këta ishin ndarë si një pjesë që nuk është Berisha!
Por, çfarë ndodhi pas dy viteve, kur çdo shqiptar e kuptoi se ky Bashizëm ishte thjeshtë një Ramizëm që nuk bëhet për herë të parë në periudhën postkomuniste dhe qëllimi i vetëm ishte si ai i Preçit, Pashkos, Meksit e Pollos me shokë dhe gjithë travestitët e tjerë, ti shërbejnë komunistëve dhe Edi Ramës për të qëndruar në pushtet!
Sot shqiptarët e kanë të qartë se kryetar i KQZ nuk është njeriu i PD sepse bashistët e identifikuan si njeriun e Berishës, dhe zgjodhën kriminelin më të madh elektoral që njeh historia e zgjedhjeve në Shqipëri, komunistin Ilirian Celibashi!
Autoriteti i Dosjeve sot është zhvesh nga “njerëzit e Saliut” jo si arritje e Edi Ramës, por si luftë e mbështetësve të Lulzim Bashës kundër Berishizmit në shërbim të pushtetit socialist të Sigurimit të Shtetit.
Sot Avokati i Popullit nuk është i Partisë Demokratike sepse bashistët refuzuan njerëzit e Sali Berishës ndërsa Edi Rama e la vendin bosh për pazare politike!
Institucionet më të reja të Drejtësisë, SPAK dhe BKH, nuk u bënë rastësisht Degë të Partisë Socialiste por janë rezultat i spastrimit nga Vettingu i të gjith atyre që u cilësuan si njerëz të Sali Berishës!
Gjykata Kushtetuese që është sot, kaq ideologjikisht nuk ishte e pastër as në diktaturë, dhe sot kemi gardianin e shtetit ligjor dhe rendit kushtetuese nën kontrollin e Sigurimit të Shtetit vetëm, me ndihmën e bashistëve që thonë se po luftojnë Berishizmin!
Patronazhistët e Edi Ramës mund ta kenë deformuar rezultatin e zgjedhjeve të 14 Majit, por ishte Bashizmi ai i cili i shkaktoi humbjen Partisë Demokratike në të paktën 8 bashki duke përfshirë atë më kryesoren, Shkodrën!
Dhe, këtu nuk ishte Bashizmi kundër Berishizmit, por, Bashizmi pro Sigurimit të Shtetit për të arritur qëllimet e Edi Ramës!
Për të gjithë ata që nuk shfryhen dot nga urrejtja që kanë për Sali Berishën dhe vazhdojnë të hanë tërfillin që u jep Edi Rama, duhet ta kuptojnë se Berishizmi ishte dhe mbeti një armë e Sigurimit që tashmë i është lagur baruti jo nga shiu i çmendur që po bie, por, nga shterimi politik që komunizmi i bëri këtij gogoli, nga piramidat që organizuan vetë deri te shitja e çdo gjëje mbi dhe nën tokën shqiptare!
Sot Bashizmi nuk ka lidhje me asgjë reale, aq më pak me kundërshtimin e Berishizmit, sepse janë vetë shkatërruesit e çdo gjëje demokratike në këtë vend!
Nëse bashistët ishin kundër rikthimit të Sali Berishës, dhe kishin të drejtë, ata nuk mund të jenë për rikthimin e Lulzim Bashës! Në ditën kur Kunati merrej me hallet e “Durrës Yachts & Marina” dhe Mohamed Alabbarit, Lulzim Basha nuk mund ta bëjë të paditurin dhe të mbajë foltore bashiste në Shkodër, aty ku vetë ai i dhuroi fitoren komunistëve dhe jo Luizi me tomkat e Benetit!
Nëse bashistët ishin ata që pretenduan se janë të djathtë, si është e mundur që shkatërruan boshtin kurrizor të së djathtës shqiptare!
Pronën kanë frikë ta zënë në gojë ose nuk u jep leje Edi Rama, por, kur përmendin Ligjin 7501 dhe për këtë fajësojnë Sali Berishën, aty tregojnë qëllimet e tyre politike, ose më saktë qëllimet shkatërrimtare pse janë në politikë! Dhe, sikur të ekzistonte Berishizmi, siç e proklamon ky llum politik, nëse jo pronarëve ai do ti shërbente të paktën Partisë Demokratike duke u rithemeluar!
Dhe, të Përndjekurit Politikë! Nëse Berishizmi luftohet duke krijuar Sekretariat për për të Pëndjekurit Politik dhe në krye të tij emëron njeriun që prodhoi të përndjekur politik me kontribut të çmuar në celulën komuniste “Koha Jonë”, ky nuk është më as mirazh, por një ide e një të çmenduri, misioni i të cilit u realizua me sukses, shkatërroi PD-në; Pavarësisht se tek një grusht i përkushtuar njerëzish, ideali lëviz në venat e tyre antikomuniste!
