Bashkëqeverisja!

nga Agim Popoci

Pas Raportit të OSBE/ODIHR që zgjedhjet e 25 Prillit i bënë të papranueshme për çdo civilizim ndërkohë që ishin pranuar nga SHBA-BE, lindi nevoja e shpikjes së një mekanizmi i cili do të qetësonte më shumë se gjysmën e shpirtrave shqiptarë që kishin votuar kundër qeverisë që u kishte bërë jetën ferr, dhe po u thuhej se ishte Edi Rama ai që e kishin votuar!

Bashkëqeverisja! Nuk është shpikje për realitetin shqiptar por u lançua fillimisht ndër demokratë për të qetësuar gjithë atë pakënaqësi që ishte akumuluar që me ndarjen e re territoriale, mbylljen e çadrës, dorëzimin e mandateve, reformën në drejtësi dhe së fundi bojkotimin e zgjedhjeve lokale duke absolutizuar pushtetin në duart e një njeriu të vetëm më 25 Prill!  

Kaq mjaftoi që demokratët të fillojnë të shohin ëndrra me sy hapur, se si zgjedhjet lokale do të anuloheshin, PD do ta merrte Presidentin, si dhe ministritë e mundshme që do ti jepte Edi Rama për ta qetësuar Lulzim Bashën dhe elektoratin e tij, dhe marrëzi të ngjashme që më shpejtësinë e rrufesë u përhapën dhe u konsideruan të pranueshme tek të gjithë ata që ishin fikur më 25 Prill!

Për socialistët Bashkëqeverisja nuk ishte risi! Ishte sprovuar me Platformën për Bashkëqeverisje “Shqiperiaqeduam.al” ku në takimet e përjavshme, Edi Rama demonstronte bashkëqeverisjen me qytetarët edhe pse nuk ishte asgjë më shumë se sa një propagandë të cilën Kryeministri me mjeshtri e shiste përmes kënaqjes së epsheve komuniste që gojëhapur shikonin shkarkimet publike të Zyrtarëve shtetëror, të cilët i kishte emëruar partia dhe partia po i degdiste në rrugë!

Por si do të bëhet funksionale kjo bashkëqeverisje! Gjithçka ishte menduar me ndryshimin e strukturave qeverisëse partiake, në veçanti asaj të PD ku lideri historik i saj, Sali Berisha, konsiderohej pengesa e vetme e këtij projekti ekstremisht idiot, pavarësisht formulës së përzgjedhjes.

Ambasadorja e SHBA në Tiranë, Yuri Kim, në cilësinë e kadiut të vendit më proamerikan në Evropë dhe njëkohësisht me komunizmin më të pranuar në një shtet të këtij  kontinenti, bëri hapin e parë duke takuar Kryetarin e PD, Lulzim Basha, për të dhënë mesazhin e qartë se sipas Amerikës, Sali Berisha duhet të largohet nga skena politike shqiptare.  

“Partia Demokratike ka luajtur një rol të pazëvendësueshëm për ta nxjerrë këtë vend nga komunizmi, për ta çliruar nga diktatura. Do të ishte ironi historike, por edhe tragjedi për këtë vend, jo vetëm për partinë, që partia të hajë bari për shkak të interesave personale të një njeriu,” tha Ambasadorja Yuri Kim duke shkaktuar stuhi jo vetëm pse ishte në shtëpinë e partisë së Sali Berishës dhe po artikulonte diçka që asnjë demokrat nuk do ta thoshte as në gjumë, por që shpërfaqi frymën e berishizmit në Partinë Demokratike, që ajo dhe partnerët e saj nuk e kishin menduar se ekziston në masë aq të madhe, ndërsa fabula enveriste me barin irritoi jo pak, ata që po dëgjonin mesazhin e njeriut të parë amerikan në Shqipëri!

Gjithsesi, demokratët në mungesë të një lideri dhe duke shpërfillur këshillën e Mbretit të Pyllit, Luanit, ranë në grackën e barit dhe filluan të zienin gjithçka në trurin e tyre se cili do të jetë fati i bashkëqeverisjes sepse ndryshe do të hanë bari; Ndërkohë, nga ideatorët e këtij projekti u mendua se zgjedhjet në Partinë Demokratike janë momenti ideal për ti dhënë fund dhe qelizave të fundit të berishizmit, me idenë se në PD mund të zbatohet “reforma” që bëri Edi Rama në Partinë Socialiste; Dhe, Lulzim Basha, njeriu që nuk u bë dot lider as për 8 vite, e pranoi edhe këtë sfidë!

Nënkryetar i PD dhe Kryetar i Grupit Parlamentar të PD u bë një njeri i cili përveç se një ish-drejtor socialist, kurrë nuk ishte marrë me politikë madje kurrë nuk kishte qenë në parlament as si vizitor, ndërsa drejtuese e bërthamës së kësaj partie, Të Përndjekurve Politikë, u bë një ushtare e radhëve të para të talibanëve shqiptarë që u rikthyen me revolucion në pushtet në vitin 1997, pa qenë kurrë e Përndjekur, madje vinte nga një familje komuniste që kishte prodhuar Të Përndjekur!

Kjo e fundit, Jonila Godole, si usta i zanatit bëri hapin e parë, dhe në ditën e emërimit nuk foli për Të Përndjekurit për çfarë kishte merak të madh, por deklaroi për media se Sali Berisha duhet të largohet nga Partia Demokratike! Që fjala e saj të zë vend u përdor gazeta zyrtare e partisë “RD” duke e publikuar në faqen e parë!

Në këtë situatë, në mungesë të liderizmit, Kryetari i PD nuk u tremb vetëm nga lideri historik por edhe nga bari, nëse do ta haj ai vetë apo s’do ketë për të gjithë ata që e votuan.

Kur ujku dhe gomari debatuan nëse bari është i gjelbër apo i verdhë, përfunduan te Luani i cili pasi i dëgjoi mori vendim që ta dënoj me burg ujkun dhe e liroi gomarin. Ujku i pakënaqur reagoi ashpër:

Ujku: O Mbret, vërtet mendon se bari është i verdhë, dhe më dënove?

Luani: Jo, bari është i gjelbër por ti je fajtor sepse debaton me gomarin!

Dhe, jo vetëm për barin! Kryetari i PD është fajtor pse lejoi debatin edhe për përjashtimin e liderit historik, Sali Berisha, nga Grupi Parlamentar ndonëse i papenguar po zbatonte urdhërat e Planit të Bashkëqeverisjes. Për këtë përdori dhe një anëtar të ri të Kryesisë që kishte qenë zëdhënës në Qeverinë e Partisë Socialiste.    

Situata u bë edhe më e paqartë dhe për ata që e urrejnë malokun Sali Berisha, pasi gjithë strukturat e reja të Partisë Demokratike dhe ekipi i liderit të saj nuk kanë të bëjnë më fare me Sali Berishën; Ekip i cili tashmë më shumë i beson Edi Ramës, më fal Yuri Kimit desha me thanë, kur akuzohet Sali Berisha si pengesa kryesore e integrimit të Shqipërisë në BE!

Në këtë situatë, radhën e kishte Edi Rama me zgjedhjet në partinë e tij. Shpalli qeverinë ku mungonin emrat e propozuar të Lulzim Bashës por ndër demokratë fabula e bashkëqeverisjes vazhdoi me Presidentin, zgjedhjet lokale, drejtori të rëndësishme që do të përcaktohen si dhe postet vakante të gjyqtarëve dhe prokurorëve.

Në daljen e parë publike pas shpalljes së qeverisë “Rama 3”, Edi Rama përjashtoi si mundësi vetëm anulimin e zgjedhjeve lokale dhe i hapi derën e bashkëpunimit Lulzim Bashës edhe për ato që, siç tha për ndarjen territoriale, nuk është dakord!

Sot nuk dihet fundi i këtij absurditeti demokratik, por me apo pa Saliun, me apo pa bashkëqeverisje, pak rëndësi ka, shqiptarët e kanë të sigurtë se do hanë bari nëse Edi Rama është Kryeministër dhe Lulzim Basha lider i opozitës, i tillë siç ishte deri më sot! Si?! Omar Khayyam e ka shpjeguar shumë kohë më parë:

“U ngjite nga balta në pasuri, por shumë shpejt u bëre princ… Mos harro, mos e vë në gjumë… mos u pasuroni përgjithmonë – pisllëku është i përjetshëm!”