Bashkëqeverisja në krizë/ Pas Bashës në VOA, Reagimi: Hipokriti iu lut në gjunjë Presidentit Meta!
Me shfaqjen e “Foltores” përveç ringjalljes së Partisë së Demokratike u fut në krizë të thellë edhe bashkëqeverisja 8 vjeçare me Edi Ramën, e cila përveç se me Marrëveshjen e Skodrës Rama-Meta mbijetoi me qeverisjen e saj të keqe edhe falë kryetarit aktual të PD, Lulzim Basha. Intervista e këtij të fundit në VOA ishte pika që derdhi gotën me helm të bashkëqeverisjes deri në shkatërrimin e Partisë Demokratike, ku si Basha ashtu dhe Meta po mundohen ti konfirmojnë opinionit publik se ende nuk e kanë shuajtur këtë etje.
Jo më 24 Prill, por dje Lulzim Basha u mundua ti bindë edhe ata pak shqiptarë që i besojnë se Ilir Meta i ka bërë dëm opozitës me deklaratat e tij, kur ai vetë e mbështeste me mitingjet e pakuptimta për shpërbërjen e parlamentit, dhe sot Meta akuzon bashkëpunëtorin e tij në shkatërrimin e PD, si kontribuuesin kryesor të Rilindjes!
“Basha që gjoja do përmbyste me dhunë regjimin në mitingun e 8 qershorit 2019, iu lut në gjunjë dhe me lot në sy Presidentit Meta, në Gjermani, për t’i anuluar zgjedhjet vendore se nuk i kontrollonte dot më njerëzit dhe se mund të kishte gjakderdhje,” thotë sot në reagimin e saj Presidenca përmes rrjetit social Facebook, pas intervistës së Lulzim Bashës për VOA dhe përcaktimit të datës së Gjykatës Kushtetuese për seancën e çështjes së “shkarkimit” të Presidentit të Republikës.
Në fund, sot kur tashmë është e qartë se pse Ilir Meta në prag të zgjedhjeve të 25 Prillit sulmoi SHBA dhe Lulzim Basha heshti edhe pse dëmtohej vetëm PD dhe rrezikohej fitorja e saj, pak rëndësi ka se çfarë thonë këta dy shkatërrimtarë të Partisë Demokratike sepse për fatin e saj të mirë më nuk vendos Edi Rama por anëtarësia e PD që më në fund ka arritur të mobilizohet! Pse rreth “Foltores”, përgjigjen e dhanë Basha dhe Meta me shpërthimin e krizës në bashkëqeverisje kur ditët e tyre së bashku me Ramën për dore, i kanë të numëruara!
Që të tre duhet të largohen jo një orë e më parë sepse shumë është për këtë vend të vjedhur, por një sekondë e më parë!
Reagimi i plotë:
Përsëri Kryetari kukull, me porosi të padronit të tij, në shëtitjet mediatike të komisionuara, u përpoq të provokonte Presidentin e Republikës Sh.T.Z Ilir Meta për të shfajësuar vetveten nga të gjitha greminat drejt të cilave e çoi opozitën nga 17 maj 2017 deri më 25 prill 2021.
Si Kontribuuesi kryesor i Rilindjes, me KATËRKËNDËSHIN e përgjegjësive të Tij madhore:
1. Bojkoti i reformës administrative-territoriale;
2. Bojkoti i reformës në drejtësi;
3. Djegia e mandateve të deputetëve;
4. Zerimi i opozitës në pushtetin vendor;
që sollën kapjen totale të shtetit, tashmë i vendosur të bojkotojë edhe Kuvendin e demokratëve nga pamundësia e ballafaqimit me ta, kërkon shpëtim duke kërkuar në mënyrë të mjerë të spostojë vëmendjen nga një tjetër krizë shumë e rëndë, ku e ka zhytur sërish opozitën.
Hipokriti, që gjoja do përmbyste me dhunë regjimin në mitingun e 8 qershorit 2019, iu lut në gjunjë dhe me lot në sy Presidentit Meta, në Gjermani, për t’i anulluar zgjedhjet vendore se nuk i kontrollonte dot më njerezit dhe se mund të kishte gjakderdhje.
Presidenti Meta në vlerësim të interesit publik dhe për të shmangur çdo përplasje, mori një vendim shumë të vështirë, për shfuqizimin e datës dhe për t’i dhënë mundësinë opozitës të përfshihej në një datë tjetër.
Por Hipokriti, që paska qenë në krah të Presidentit të Republikës, as nuk denjoi të regjistrojë PD në KQZ për zgjedhjet e 13 tetorit 2019, sepse kështu i interesonte Rilindjes, për t’i thënë botës, që Presidenti ia fut kot se PD nuk do zgjedhje.
Kryetari, kukull ka qenë, është dhe do të mbetet i tillë, deri në fund, dhe asnjë spërdredhje, pazar apo mashtrim nuk ia ndryshon dot fundin e paracaktuar si çdo kukulle në politikë.
