BE i kërkon falje Italisë që e la të vetme të përballej me koronavirusin

Presidentja e Komisionit Europian, Ursula von der Leyen, i ka ofruar një “falje të përzemërt” Italisë duke e lënë të vetme në fillim të pandemisë koronavirus.

“Po është e vërtetë që askush nuk ishte me të vërtetë gati për këtë. Gjithashtu është e vërtetë që shumë prej neve nuk ishin atje në kohën kur Italisë i duhej një ndihmë që në fillim. Dhe, po për këtë, Evropa sot i kërkon falje të përzemërt,” tha sot Ursula von der Leyen para Parlamentit Europian, raporton BBC

Ndryshe, sipas të dhënave të Universitetit Johns Hopkins, më shumë se 21.000 njerëz kanë vdekur nga koronavirusi në Itali, që është dhe numri më i lartë i vdekjeve në Evropë.

Ndërsa Italia u përpoq të kontrollonte shpërthimin e epidemisë në fillim të muajit mars, Franca dhe Gjermania vendosën kufizime në eksportin e maskave, përkundër paralajmërimeve të Komisionit Europian se veprime të tilla mund të minonin përgjigjen kolektive ndaj koronavirusit.