BE i tha jo çeljes negociatave/ Maqedoni e Veriut, liderët e partive në takim për zgjedhje të parakohshme

Organizimi i zgjedhjeve të parakohshme parlamentare në Maqedoninë e Veriut është tema kryesore e takimit të sotëm të liderëve të partive më të mëdha politike, ku pritet të dalin me një vendim.

Takimi është organizuar nga Presidenti Stevo Pendarovski, pasi BE nuk çeli negociatat me Maqedoninë e Veriut. Takimi, raporton Alsat pritet të filloi në ora 17:00 në rezidencën presidenciale “Villa Vodno”.

Mësohet se Presidenti Pendarovski ka marrë përgjigje pozitive nga të gjithë të ftuarit, liderët e partive më të mëdha politike nga qeveria dhe opozita.

Të gjithë të ftuarit në këtë takim, kërkuan zgjedhje të parakohshme. Kryeministri Zoran Zaev propozoi zgjedhje të parakohshme parlamentare sa më shpejtë që është e mundur.

“Propozoj organizimin e zgjedhjeve të shpejta parlamentare. Zgjedhje sa më shpejtë të jetë e mundur. Zgjedhje në të cilat qytetarë do të vendosin rrugën në të cilën duhet të ecë shteti. Ky do të jetë edhe propozimi im në takimin e nesërm të liderëve te Presidenti Pendarovski. Qytetarët do të vendosin se a do të ndërtojmë partneritet me fqinjët dhe vende tjera demokratike, ose do të vazhdojmë me konfrontime dhe probleme me fqinjët dhe të gjithë miqtë tanë,” Zoran Zaev.

Kryetari i VMRO DPMNE opozitare, Hristijan Mickovski tha se deklarata e Zaevit për zgjedhje të parakohshme parlamentare dëshmon se vetë kryeministri ka pranuar dështimet e tij. Mickovski tha se në takimin e sotëm të liderëve pret ta dëgjojë drejtpërdrejtë propozimin nga Zaevi duke shtuar se pret zbatimin e ligjit për Qeveri teknike.

“Ligji është i qartë, dihet se çfarë do të thotë zgjedhje parlamentare, çfarë nënkuptojnë ligjet në zgjedhjet parlamentare, etj. Thjesht duhet t’i respektojmë dhe menjëherë të shpallim zgjedhje dhe të formojmë qeveri teknike, kryeministër teknik dhe të shkojmë në zgjedhjet e parakohshme parlamentare”, deklaroi Mickoski pas një ngjarje partiake në Gostivar, si pjesë e fushatës “Bisedime për rindërtimin e Maqedonisë,” tha Mickoski.

Kryetari i BDI-së, Ali Ahmeti tha se partia e tij është e gatshme për zgjedhje të parakohshme.

“Zgjidhja me e mirë për vendin është të shkohet në zgjedhjet e jashtëzakonshme. Nuk do të doja të vendosemi si gjahtarë të fajeve sepse është e papranueshme të pranosh faj të pa bërë. Republika e Maqedonisë së Veriut është dëm kolateral i dallimeve që ka BE. Franca shfrytëzoj veton për arsye se BE është në kërkim të ndërtimit të situatave të reja për zgjerim dhe lideri i idesë është Franca. Me keqardhje e kanë prit të gjithë vendet më të mëdhenj të BE,” tha Ahmeti.

Nga Aleanca për Shqiptarët thonë se kërkesa për zgjedhje të parakohshme është lajmi i mirë pas dështimit që vendi të marrë datë për nisjen e bisedimeve me BE-në.

“Lajmi të cilin e paralajmëroi kryeministri Zaev, që vendi duhet të shkojë në zgjedhje të parakohshme, është një lajm i mirë një lajm shprese, si rezultat i dhënies së përgjegjësisë edhe për një vit të humbur integrues. Ne jemi te bindur se se me këtë rast qytetarët e Republikës së Maqedonisë por në veçanti votuesit shqiptar do të kenë mundësi për të dhënë një legjitimitet të ri politik, sepse është vlerësuar se forcat udhëheqëse politike që janë pjesë e Qeverisë nuk kanë kredibilitetin dhe kapacitetin e duhur politik për ta çuar vendin drejt aspiratave tona dhe të qytetarëve për përcaktimin e vetëm të vendit tonë siç është BE-ja,” tha zëdhënësi i partisë, Flakron Bexheti.

Edhe Lëvizja Besa ka përshëndetur  propozimin e kryeministrit Zoran Zaev që vendi të shkojë në zgjedhje të parakohshme parlamentare. Nga ky subjekt politik rikonfirmojnë qëndrimin e tyre për mbajtjen e zgjedhjeve të parakohshme parlamentare në kohë sa më të shpejtë.

“Për fat të mirë, sygjerimin e Lëvizjes BESA për zgjedhje të parakohshme parlamentare e kuptoj drejt dhe qartë edhe kryeministri i vendit Zoran Zaevi cili përfundimisht e kuptoj se është koha që legjitimiteti t’i kthehet sovranit, i cili do të vendosë se kujt do t’i bartë përgjegjësinë për të udhëhequr me shtetin pas zgjedhjeve parlamentare,” thekson Lëvizja Besa.

Partia Alternativa, pjesë e Qeverisë kërkon sa më shpejtë të mbahen zgjedhjet e parakohshme.

“Alternativa kërkon që sa më shpejt të shpallen zgjedhje të parakohshme dhe ta verifikojmë verdiktin e qytetarit për përfaqësuesit e dëshiruar. Për këto arsye, planifikojmë që së shpejti ta ftojmë Kuvendin Qendror të partisë për ta marrë vendimin përfundimtar përkitazi me qëndrimin dhe pozicionin tonë të mëtutjeshëm. Natyrisht, para kësaj kërkojmë të ridefinohet Kodi Zgjedhor dhe të pastrohet lista zgjedhore,” tha Kryetari i kësaj partie, Afrim Gashi.

Presidenti Pendarovski në fjalimin e tij para opinionit pas vendimit negativ të Këshillit Evropian tha se tani është koha për të treguar unitet rreth orientimit strategjik të vendit, pavarësisht nga dallimet legjitime politike për shumë çështje.

Ndryshe, sipas ligjit për Qeveri teknike për të cilin foli Mickovski, Neni 43 i Ligjit për Qeveri, thekson se 100 ditë para zgjedhjeve, kryeministri aktual duhet të japë dorëheqje ndërsa Parlamenti duhet të zgjedh Qeveri kalimtare për organizimin e zgjedhjeve, e cila kryesohet nga kryeministri i ri, i nominuar nga partia me numrin më të madh të deputetëve në Parlament.

Në Qeverinë teknike, opozita do të udhëheqë Ministrinë e Punëve të Brendshme dhe Ministrinë e Punës dhe Politikës Sociale, ndërsa zv.ministrat në këto institucione do të jenë të pushtetit.

Opozitës i takojnë edhe zëvendësministra në Ministrinë e Financave, Ministrinë e Bujqësisë dhe Ministrinë e Shoqërisë Informatike dhe Administratës.

Ministrat dhe zv/ministrat e zgjedhur në Qeverinë teknike, kanë mandat deri në ditën e shpalljes së rezultateve nga KQZ-ja.