BE i tha JO/ Dielli lindi përsëri, ekspertët e NASA-s drejt Shkupit

Bashkimi Europian për 1001 arsye i tha JO çeljes së negociatave me Shqipërinë dhe Maqedoninë e Veriut, por ashtu siç premtoi Kryeministri Edi Rama në prag të këtij vendimi, Dielli lindi përsëri.

“Për pak ditë mësojmë përfundimin, por sidoqoftë të nesërmen dielli do lindë përsëri e dita do jetë vazhdimi i përpjekjes për shtetbërje, jo për Brukselin, jo për Berlinin, por për Shqipërinë e Shqiptarët,” tha Edi Rama për shqiptarët që sot u zgjuan duke bashkëjetuar sërish me krimin, me prodhues dhe trafikantë droge nëpër këmbë, me shtetin që nuk funksionon dot pa korrupsion dhe atdheun e tyre shumë më larg Evropës se sa në vitin 2013, kur erdhi në pushtet me ndihmën e Presidentit të Serbisë, Boris Tadiç.

Sot në Shqipëri lindi dielli edhe pse pas dhjetë vjetësh anëtare e NATO-s, toka, uji, ajro dhe vetë radarët shqiptarë shërbejnë për trafikantë droge dhe jo për sigurinë e shtetit shqiptarë dhe Aleancë Veriatlantike.

Sot në Shqipëri lindi dielli por nuk e ndriçon dot Shqipërinë që e ka kapluar errësira dhe kërcënohet nga pezullimi i lëvizje së lirë për zonën Schengen, të përfituar dhjetë vjetë më parë.

Sot në Shqipëri lindi dielli, nga e cila shqiptarët ikin drejtë një jete më mirë të cilën nuk e shohin më në horizont sepse e kanë shuar me terror dhe krim, Edi Rama dhe faraonët e tij; Për çfarë, me të drejtë ankohet edhe Presidenti i Francës, Emmanuel Macron ndonëse është socialist dhe e konsideron veten liberal. En Marche edhe mund ta kuptoj një emigrant nga Afganistani por jo edhe një emigrant që vjen nga familja Veriatlantike, ku bënë pjesë si Franca e Macronit ashtu edhe Shqipëria që aktualisht qeveriset nga Edi Rama, dhe thuhet se eksportojnë siguri.

Sot në Shqipëri lindi dielli edhe pse shqiptarët janë të pashpresë, dhe nuk u duhet më dielli sepse nuk kanë se çfarë të shohin, dhe ashtu si Holanda dhe Franca kanë 1001 arsye për të mos shpresuar se me Edi Ramën dita do jetë vazhdimi i përpjekjes për shtetbërje, jo për Brukselin, jo për Berlinin, por për Shqipërinë e Shqiptarët.

Sot në Shqipëri lindi dielli edhe pse shqiptarët janë shumë më afër Serbisë se sa Kosovës së coptuar nga vëllai i Edi Ramës, presidentit serb Aleksandar Vuçiç.

Dhe në fund, në këtë katrahurë hapësinore të krijuar nga komunistët shqiptarë, dielli lindi edhe në Maqedoninë e Veriut. Të shqetësuar për këtë dukuri që po i ndodhë planetit Tokë, ekspertët e Administratës Kombëtare Aeronautike Hapësinore Amerikane, NASA, u nisën urgjentisht drejtë Shkupit.

Ndonëse e themeluar në vitin 1958, Agjencia përgjegjëse për programe hapësinore publike e Shteteve të Bashkuara, përgjegjëse për kërkime afatgjata aerohapësinore civile dhe ushtarake, e cila i dha përgjigje shumë fenomeneve në hapësirë, e përballur me shumë pikëpyetje nisi ekspertët e saj për ta zbërthyer këtë enigmë:

Si mund të lind dielli në Shkup kur atje Kryeministër nuk është Edi Rama!