BE i tha JO Shqipërisë/ Reagimi, Basha: Arsyeja e vetme, krimi dhe korrupsioni i Edi Ramës!

Pasi ministrat e Jashtëm të BE, i thanë JO hapjes së negociatave me Shqipërinë, dhe Kryeministri Edi Rama sërish e shndërroi në festë duke e quajtur lajm pozitiv nga Europa, reagon Kryetari i Partisë Demokratike Lulzim Basha duke theksuar se vendimi i BE ishte i pritshëm por i trishtë për vendin, dhe ka vetëm një përgjegjës, ai është Edi Rama.

“Sot, Shqipërisë iu mohua për të tretën herë, nën qeverisjen Rama, hapja e negociatave për anëtarësim me BE. Edhe pse i pritshëm,është një lajm i hidhur për ne shqiptarët, që, edhe 30 vjet pas rënies së komunizmit, vazhdojmë të mbetemi vendi më i izoluar nga Europa.

Edhe më i rëndë është fakti se, më shumë se një refuzim i përkohshëm i negociatave, sot, ne shqiptarëve, po na vihet në dyshim aftësia për të përqafuar dhe jetuar sipas standarteve dhe vlerave europiane. Propaganda e Edi Ramës dhe mercenarëve të tij, do të përpiqet ta mohojë refuzimin. Pasi do te dështojnë ta mohojnë, do të përpiqen t’ia veshin fajin të tjerëve. Edi Rama do të fajësojë Europën se ka probleme të vetat.”

Dhe jo vetëm kaq!

Propaganda e Edi Ramës, tha Lulzim Basha, do të fajësojë opozitën që nuk rri urtë para keqqeverisjes së tij. Do të fajësojë gjysmën e botës. Do të fajësojë edhe popullin e vet. Nuk do të fajësojë vetëm një njeri: Edi Ramën.

“Mos u gënjeni nga propaganda e tij. Ka vetëm një përgjegjës për refuzimin e vazhdueshëm ndaj Shqipërisë: Është qeveria dhe Edi Rama. Ka vetëm një arsye pse na janë mbyllur dyert e Europës: korrupsioni dhe krimi,” konstaton Kryetari i PD, Lulzim Basha duke përfunduar:

“Negociatat sot do te ishin hapur, nëse Shqipëria nuk do të kishte qeverinë më të korruptuar në Europë, nëse Shqipëria nuk do të ishte zonë e lirë e drogës dhe e krimit.”