BE i thotë JO!/ Reagimi, PD: Kryeministri i Shqipërisë e ka blerë pushtetin me krimin e organizuar!
Kur kanë ngelur edhe pak ditë deri tek Samiti i BE ku dhe do të vendoset nëse Bashkimi Europian do të çelë negociatat me Shqipërisë ndërkohë të gjitha mediat serioze ndërkombëtare, dhe së fundmi, Reuters, EU Observer dhe Euroactiv duke cituar zyrtarë të lartë europianë që theksojnë se do të refuzohen bisedimet me vendin tonë, ashtu si dhe liderët më me ndikim sot në Bashkimin Europian, Partia Demokratike reagon përmes Sekretarit të Përgjithshëm, Gazment Bardhi, duke theksuar se kjo ndodhë për faktin e vetëm se Shqipëria drejtohet nga një qeveri dhe nga një kryeministër, që njihet në të gjithë Europën si kryeministri më i korruptuar, që ka blerë pushtetin në pakt me krimin e organizuar.
“Përgjimet e publikuara pak ditë më parë në gazetën gjermane ‘Bild’, me qarkullimin më të madh në Europë, provuan si plotësisht të vërtetë çdo denoncim të Partisë Demokratike se Edi Rama nuk ka vullnet për të bërë zgjedhje të lira e të ndershme, se Edi Rama, për pushtetin dhe pasurinë e tij personale, bën pakt edhe me djallin. Në përgjimet e gazetës gjermane ‘Bild’ gjendet arsyeja përse Europa refuzon të pranojë në familjen e vet një vend, ku bandat dhe krimi i organizuar janë zotër të partisë në pushtet, Partisë Socialiste, blejnë vota dhe kërcënojnë kundërshtarët politikë për llogari të kryeministrit Edi Rama,” thekson Gazment Bardhi duke risjell edhe një herë në vëmendjen e publikut përgjimet e publikuara nga e përditshmja gjermane “Bild”, përgjime të cilat po e detyrojnë Edi Ramën të sajojë çdo marrëzi, për të larguar vëmendjen prej të vërtetës:
“Edi Rama ka blerë pushtetin me krimin, ai është kryeministër ilegjitim dhe ai duhet të largohet me sa më pak kosto për vendin.”
Shqiptarët, tha Sekretari i Përgjithshëm i PD, janë dëshmitarë se përgjimet e publikuara nga gazeta gjermane “Bild” nuk janë një rast i shkëputur. Disa muaj më parë, investigimi i VOA paralajmëroi shqiptarët sesa e thellë ishte gropa e krimit dhe e korrupsionit, në të cilën ishte futur Edi Rama, duke tërhequr me vete edhe Shqipërinë.
“Përgjimet e publikuara nga Zëri i Amerikës, edhe ato pjesë e dosjes 339, tregojnë se Edi Rama kontrollon gjithçka, nga rezultati i zgjedhjeve në bashkëpunim me bandat, deri tek emërimi i policëve në burgje. Nuk ka sot asnjë shqiptar apo mik të Shqipërisë që nuk e di se Edi Rama është arkitekti i vjedhjes së zgjedhjeve në Shqipëri nëpërmjet paktit të tij me krimin e organizuar,” tha Bardhi duke shtuar se sot nuk ka ansjë dyshim, se Edi Rama, si përgjegjës kryesor i krizës politike, kushtetuese, i krizës ekonomike dhe sociale në vend, si përgjegjës për mbylljen e derës së Europës dhe si rreziku më i madh për rikthimin e vizave për shqiptarët, duhet të largohet.
Largimi i Edi Ramës si standardi minimal europian i një kryeministri të kapur në flagrancë në bashkëpunim me krimin e organizuar dhe oligarkinë duke vjedhur zgjedhjet, taksat dhe pasuritë publike të shqiptarëve është hapi i vetëm që i hap rrugën një zgjidhjeje politike sipas standardeve demokratike perëndimore, vlersëson ai, si dhe krijimin e një qeverie tranzitore për t’i garantuar vendit zgjedhje të lira e të ndershme:
“Me këtë qëllim, qytetarët do të bashkohen të premten e ardhshme, më 21 Qershor, si kurrë më parë në histori, për t’i treguar botës mbarë vendosmërinë e palëkundur se ne, shqiptarët, nuk heqim dorë nga aspirata për ta bërë Shqipërinë si gjithë Europa. Asnjë hap pas,” garanton Sekretari i Përgjithshëm i Partisë Demokratike, Gazment Bardhi, duke përfunduar:
“Boll më me Shqipërinë që duan Edi Rama, një grusht pushtetarësh të korruptuar në palcë, një grusht kriminelësh dhe oligarkësh grabitqarë! Tani është koha për Shqipërinë e të gjithë shqiptarëve!”
