BE: Javën e ardhshme hapen negociatat me Tiranën dhe Shkupin

Liderët e Bashkimit Evropian kanë përshëndetur votimin e Parlamentit të Maqedonisë së Veriut në favor të propozimit francez, duke paralajmëruar se në javën e ardhshme do të zhvillohen konferencat e para ndërqeveritare të BE-së me Shqipërinë dhe Maqedoninë e Veriut, duke hapur formalisht negociatat e anëtarësimit.

“Urime Maqedonisë së Veriut për votimin i cili tash shtron rrugën për hapjen e shpejtë të negociatave të anëtarësimit. Ishte një rast historik dhe ju e shfrytëzuat atë. Një hap i madh drejt të ardhmes suaj, të ardhmes evropiane,” tha presidentja e Komisionit Evropian, Ursula von der Leyen ndërsa Presidenti i Këshillit Evropian, Charles Michel, raporton RFE, shprehet:

“E ardhmja jonë është e përbashkët dhe ne ju mirëpresim me duar të hapura,” thekson Michel përmes rrjeteve sociale, duke shtuar se votimi i sotëm ishte një hap i madh i Maqedonisë së Veriut drejt BE-së.

Ndërsa Kryeministri i Shqipërisë, Edi Rama, duke mirëpritur vendimin e Shkupit ka paralajmëruar se javën e ardhshme Shqipëria do të nisë negociatat e anëtarësimit.

Ndryshe, raporton RFE, sot Parlamenti i Maqedonisë së Veriut miratoi propozimin francez, që i hap rrugën integrimit të vendit në Bashkimin Evropian. Bullgaria, si shtet anëtar i BE-së, për më shumë se dy vjet kishte mbajtur në fuqi veton ndaj nisjes së negociatave të Shkupit me Brukselin, për shkak të mosmarrëveshjeve sa i përket gjuhës dhe historisë.