BE kërkon nga Serbia të hap arkivat e UDB-së
Parlamenti Evropian përmes një Rezolute për Serbinë i ka bërë thirrje Beogradit zyrtar që të rihapë dosjet sekrete të inteligjencës dhe strukturave të tjera të sigurisë që kanë operuar në të kaluarën duke përfshirë këtu edhe arkivat e UDB-së.
Kjo Rezolutë e Fundit, siç shpjegohet, e cila u bë në bazë të versionit përfundimtar të Raportit të raportuesit të PE për Serbinë, Vladimir Bilçik, do të ishte një hap i mëtejshëm drejt demokratizimit të Serbisë.
Ekspertët ligjorë serbë kanë thënë për gazetën serbe Danas se nuk janë të befasuar nga fakti që ky segment për dosjet është përfshirë në Rezolutë, sepse Brukseli zyrtar u ka bërë thirrje autoriteteve serbe për ta bërë këtë për vite me radhë.
Sipas burimeve të Danas, nuk duhet të pritet që skedarë të tillë do të jenë në dispozicion të publikut në të ardhmen e afërt, duke pasur parasysh rezistencën që ekziston në strukturat aktuale të sigurisë dhe informacionit për ta bërë këtë.
Për hapjen e dosjes ka kërkesa edhe nga faktorë të brendshëm në Serbi, siç është, Aleksandar Çotriç, nënkryetari i Lëvizjes Serbe për Ripërtrirje, SPO. Ai ka kërkuar të miratohet një ligj “mbi hapjen e dosjeve të shërbimit sekret”.
“Një ligj i tillë është një kusht i domosdoshëm për pranimin e Serbisë në BE dhe siguron që të përballemi me një të kaluar totalitare dhe autoritare, që personat përgjegjës për shkeljet e të drejtave të njeriut të sanksionohen dhe që krimet e shtetit kundër qytetarëve nga e kaluara të mos përsëriten kurrë,” tha Çotriç.
LIderi i SPO, si deputet ka propozuar edhe një ligj i cili merr “parasysh përvojat më të mira të ish vendeve komuniste”.
Eurodeputetët kanë edhe një shqetësim tjetër me Serbinë. Lidhjen që po forcohet të shteti serb me Kinën dhe ndikimit që ka fituar shteti aziatik.
“Sa i përket segmentit që lidhet me politikën e jashtme të Serbisë, eurodeputetët nuk e fshehin shqetësimin e tyre për forcimin e ndikimit të Kinës në Serbi, si dhe për ‘vazhdimin’ e mbështetjes serbe për Rusinë në kontekstin e aneksimit të Krimesë, e cila ishte e paligjshme në sytë e BE-së,” raporton Danas.
Hapja e dosjeve të regjimit serb dhe shërbimeve të tyre sekrete do të zbulonte edhe shumë vrasje të shqiptarëve të Kosovës, bërë në periudha të ndryshme.
Ka veprimtarë të shumtë, siç është Ukshin Hoti, që në rrethana të dyshimta janë zhdukur dhe vrarë prej vitesh dhe ende dihet shumë pak për operacionet sekrete serbe që çuan në vrasjen e tyre.
