BE: Kosova ka të drejtë të heqë gradualisht targat “KM”

Bashkimi Evropian, BE, është njoftuar me kohë mbi vendimin e Qeverisë së Kosovës për anulimin e targave të lëshuara nga autoritetet serbe në Kosovë.

Zëdhënësi i BE-së, Peter Stano, tha se Prishtina zyrtare ka të drejtën e një vendimi të tillë.

“Sipas marrëveshjeve nga dialogu për lirinë e lëvizjes nga viti 2011-të dhe 2016-të, Kosova ka të drejtë që gradualisht t’i heqë targat ‘KM’,” tha Stano duke konfirmuar se BE është njoftuar në fillim të kësaj jave për planet e Qeverisë së Kosovës, por tha se nuk janë konsultuar.

Sipas zëdhënësit së Brukselit, raporton RFE, është e rëndësishme që të jepet kohë e mjaftueshme për zbatimin e këtij plani dhe që ai të përgatitet dhe zbatohet në konsultim të ngushtë me qytetarët e prekur dhe në përputhje me praktikat e mira evropiane.

Vendimi i Qeverisë së Kosovës ka shkaktuar reagim të ashpër nga Beogradi. Në reagimin e tij, presidenti i Serbisë, Aleksandar Vuçiç, më 29 qershor ka akuzuar zyrtarët kosovarë se po përgatitin “persekutimin” e popullatës serbe. Ai nuk ka paraqitur asnjë provë për këto pretendime.

I dërguari i posaçëm i BE-së për dialogun Kosovë-Serbi , Mirosllav Lajçak, ishte në Beograd në momentin kur Qeveria e Kosovës shpalli vendimin. Ai ka vlerësuar se në marrëdhëniet mes Serbisë dhe Kosovës është krijuar një situatë e re, e cila ka ndryshuar planet dhe qëllimet e vizitës së tij.