BE ndryshon patentat, ja si do paguhen gjobat, si pezullohen…

Komisioni Europian, KE, sot në kuadër të paketës ligjore për sigurinë rrugore, ka propozuar patentën e përbashkët digjitale për drejtimin e automjetit në BE, dhe rregulla të reja që do lehtësojnë pagesën e gjobës për shkelje në një shtet tjetër anëtar, si dhe pezullimi i patentës.

“Me propozimin e ri po mundohemi të thejshtësojmë rregullat për patentën e drejtimit të automjetet duke i harmonizuar njëkohësisht me përparimin e teknologjisë, në mënyrë që shoferët e ri të aftësohen mirë,” tha Komisionerja për trafik, Adina Valean.

Çfarë propozohet?

Në paketën e re ligjore parashikohet të eliminohet mosndëshkueshmëria e atyre që bëjnë shkelje në trafik në një shtet tjetër anëtar përmes shkëmbimit më të mirë të informacioneve dhe skualifikimit të shoferëve që kryejnë shkelje të rënda në trafik, tha Komisionerja.

KE propozon patentën digjitale për tu njohur më lehtë në mes të shteteve, madje e gjithë procedura e dhënies së patentës është menduar, online. Përveç patentës digjitale që çdo drejtues do ta ketë në celular, do ekzistoj edhe ajo fizike.

Pjesë e këtyre ndryshimeve është edhe peridhua provuese për shoferët e rinjë për të paktën dy vjet pas dhënies së provimit, por dhe toleranca zero për alkoolin për shoferët e rinjë ndonëse vetëm 8 për qind e shoferëve më të rinjë se 30 vjeç, janë pjesë e 2 prej 5 rasteve të aksidenteve me vdekshmëri.

Gjithashtu, propozohet që drejtuesi me Kategori B të ketë mundësi të drejtoj mjetin me peshë deri në 4.25 tonë, në vend të peshës aktuale 2.5 tonë.

Komisioni propozon direktivën e re edhe për pezullimin e patentës së shoferit për shkelje të rënda në trafik pavarësisht se në cilin shtet është kryer shkelja. Aktualisht ende ka boshllëqe që u mundësojnë shoferëve që u është marrë patenta në një shtet për shkak të shkeljes së rëndë në trafik, që kur të kthehen në shtetin e tyre ta shpallin të humbur patentën dhe ta marrin patentën e re.

Me propozimin e ri kjo pamundësohet duke specifikuar shkeljet unike në BE për të cilat pezullohet patenta: mbi 50 km/h nga shpejtësia e lejuar, drejtimi i automjetit nën ndikimin e alkoolit ose drogës dhe shkaktar i aksidentit të trafikut me pasojë lëndimi të rëndë ose vdekjes.

Shteti në të cilin është pezulluar patenta është e detyruar ta informoj shtetin ku patenta është lëshuar.

Rregullat aktuale parashikojnë që të dhënat të shkëmbehen vetëm në rast të tejkalimt të shpejtësisë ose drejtimit të automjetit nën ndikimin e alkoolit.

Komisioni Europian propozon që kjo të zgjerohet edhe për këto shkelje: mosmbajtja e distancës së mjaftueshme në mes mjeteve; parakalim i rrezikshëm; parkim i rrezikshëm; parakalim mbi vijën e plotë; drejtimi i mjetit në drejtim të gabuar; mosrespektimi i rregullit për lirimin e korridorit për ambulancën dhe drejtimi i automjetit me mbingarkesë.