BE nuk do të vazhdoj kontratat me AstraZeneca dhe Johnson & Johnson
Komisioni EUROPSPA ka vendosur që vitin e ardhshëm të mos vazhdoj kontratën për furnizimin me vaksina kundër koronavirusit nga kompanitë farmaceutike AstraZeneca dhe Johnson & Johnson që prodhojnë vaksina me virus vektor, shkruan sot e përditshmja italiane La Stampa duke ju referuar një burimi nga ministria e Shëndetësisë.
“Komisioni Europian në marrëveshje me shumicën e liderëve të vendeve anëtare ka vendosur që kontratat që janë firmosur me kompanitë që prodhojnë vaksina me virus vektor, e që vlejnë për vitin e ardhshëm, të mos vazhdohen në momentin që skadojnë,” shkruan e përditshmja italiane.
Vaksinat me virus vektor, ku përdoret virusi i parrezikshëm që udhëzohet në qelizat e trupit, prodhohen nga kompania britaniko-suedeze AstraZeneca dhe ajo amerikane Johnson & Johnson.
Besueshmëria e popullit në vaksinat e të dy këtyre komapnive është goditur nga rastet e mpiksjes së gjakut. Agjencia europiane për barna, EMA, ka bërë të ditur se ekziston ndërlidhja e këtyre rasteve me vaksinën AstraZeneca, por vazhdon të konsideroj se dobitë e këtij ilaçi janë më të mëdha se rreziku nga efektet anësore.
Kompania britaniko-suedeze edhe më parë është vonuar me furnizimin e sasisë së kontraktuar të vaksinave, arsye kjo që BE është shumë mbrapa SHBA-së dhe Britanisë së Madhe në vaksinimin e popullsisë.
Të hënën, futjen e vaksinës kundër COVID-19 në BE e ka shtyrë edhe Johnson & Johnson pasi Agjencia amerikane për ushqim dhe barna, FDA, lëshoi një komunikatë ku kërkon pezullimin e përkohshëm të vaksinimit me këtë vaskinë, gjithashtu për shkak të mpiksjes së gjakut.
Komisioni Europian ka kërkuar sqarime nga kompania amerikane për shkak të paralajmërimit të papritur për shtyrjen e furnizimit me vaksina të Bashkimit Europian
Sot, La Stampa raporton se në kontratat e ardhshme Brukseli do të përqëndrohet në vaksinat që shfrytëzojnë teknologjinë mRNA, siç janë Pfizer dhe Moderna, si dhe vaksina gjermane CureVac e cila është në pritje të miratimit për përdorim në BE.
