BE parashikon recesion të përmasave historike

Bashkimi Evropian tha sot se parashikon recesion të përmasave historike këtë vit, për shkak të ndikimit të pandemisë së koronavirusit.

Në parashikimin e parë zyrtar të dëmit nga pandemia thuhet se ekonomia e BE-së do të tkurret për 7.5 për qind këtë vit, përpara se të rritet për rreth 6 për qind vitin e ardhshëm.

Eurozona, grup prej 19 vendeve që përdorin monedhën euro, do të pësojë rënie ekonomike për 7.75 për qind, ndërsa do të rritet për 6.25 për qind më 2021.

“Evropa po përjeton një tronditje ekonomike, të paparë që nga Depresioni i Madh,” tha komisioneri për Ekonomi i BE-së, Paolo Gentiloni.

Sipas Qendrës Evropiane për Parandalimin dhe Kontrollin e Sëmundjeve, raporton RFE, koronavirusi ka prekur mbi 1.1 milion njerëz në Evropë dhe ka vrarë mbi 137.000.

Masat e izolimit që i kanë ndërmarrë vendet për të frenuar përhapjen e koronavirusit, kanë dëmtuar shpenzimet e konsumatorit, prodhimin industrial, investimet, tregtinë, flukset e kapitalit dhe zinxhirët e furnizimit.

Ato po ashtu kanë ndikuar vendet e punës.

Norma e papunësisë në BE parashihet të rritet nga 6.7 për qind sa ka qenë në vitin 2019, në 9 për qind këtë vit, ka thënë Komisioni Evropian.