BE pritet ta miratojë vaksinën Pfizer brenda muajit dhjetor

Agjencia Evropiane e Barnave, EMA, do të vendosë brenda javësh për autorizimin ose jo të vaksinës kundër COVID-19 të kompanive Pfizer dhe BioNTech.

“Një mendim mbi autorizimin mund të lëshohet brenda disa javësh varësisht nga të dhënat për cilësinë, sigurinë dhe efektivitetin e vaksinës,” tha Agjencia EMA duke saktësuar se vlerësimi për vaksinën mund të jetë gati më së voni deri më 29 dhjetor.

Edhe kompania Moderna e cila ka përfunduar fazat e testimit të vaksinës së saj kundër COVID-19, kërkon autorizimin për përdorim në vendet evropiane. Vendimi për këtë vaksinë mund të merret jo më vonë se data 12 janar.

Në javët e fundit, raporton RFE, rezultatet pozitive të vaksinave kanë ngjallur shpresat për t’i dhënë fund pandemisë që ka goditur ekonomitë, dhe ka marrë më shumë se 1.45 milion jetë në të gjithë botën. Të dyja këto kompani synojnë autorizimin edhe për përdorim të vaksinave në Shtetet e Bashkuara.

Këshilltarët e pavarur të Administratës Amerikane të Ushqimit dhe Barnave do të takohen më 10 dhjetor për të shqyrtuar të dhënat e kompanisë Pfizer ndërsa më 17 dhjetor për të shqyrtuar të dhënat e provave të Modernas. Menjëherë pasi të fitojë autorizimin e përdorimit emergjent, raporton Agjencia e lajmeve Reuters, Moderna pret që vaksina të transportohet në pikat e caktuara të shpërndarjes në të gjithë Shtetet e Bashkuara.