BE reagon pas deklaratave të kryeministres serbe

Bashkimi Evropian ka reaguar pas deklaratave të kryeministres së Serbisë, Ana Brnabiç, se në Kosovë, sipas saj ka zyrtarë shtetërorë “që vërtet kanë dalë prej malit”, duke konsideruar se secila retorikë që është fyese, konfrontuese dhe ndarëse, është kundër frymës së bashkëpunimit dhe pajtimit që i duhet rajonit për të ecur përpara.

Në një përgjigje dhënë RFE, Maja Kocijançiç, Zëdhënësja e Përfaqësueses së Lartë të Bashkimit Evropian për Punë të Jashtme, Federica Mogherini, tha se “ngjarjet e ditëve të fundit kanë treguar qartë se dialogu mes Prishtinës dhe Beogradit, duhet të rezultojë me një marrëveshje të qëndrueshme dhe afatgjatë për normalizim të marrëdhënieve” dhe se status-quoja nuk është mundësi.

Pas deklaratës së kryeministres serbe Presidenti i Kosovës, Hashim Thaçi, tha se gjuha e përdorur nga kryeministrja e Serbisë, Ana Brnabiç, është “edhe një tjetër dëshmi e urrejtjes patologjike të regjimit aktual të Serbisë kundër qytetarëve të Kosovës”.

Ndryshe, Brnabiç i ka bërë këto komente në prani të ambasadorit të Bashkimit Evropian në Serbi, Sem Fabrizi.