BE: Reformë Zgjedhore konsensuale, Basha: Opozita është e gatshme!

Pasi Komisioneri për Zgjerimin pranë BE, Oliver Varhelyi, kërkoi miratimin e reformës zgjedhore në mënyrë konsensuale, jo të njëanshme, ka reaguar Kryetari i Partisë Demokratike, Lulzim Basha, ndërsa falënderoi Komisionerin Varhelyi tha se Opozita është plotësisht e angazhuar për ta përmbulljr Reformën me garanci të mjaftueshme për një proces të ndershëm zgjedhor.

“Faleminderit Komisionerit Oliver Varhelyi për përkushtimin për konsensus të të gjitha forcave politike për reformën elektorale në Shqipëri: Opozita është plotësisht e angazhuar dhe po kontribuon për ta përmbulljr reformën me garanci të mjaftueshme për një proces të ndershëm zgjedhor,” tha Lulzim Basha në reagimin e tij përmes rrjetit social Twitter ndërsa përfundoi:

“Kjo është e rëndësishme për të rikthyer besimin e shqiptarëve tek demokracia pas manipulimeve të rënda zgjedhore dhe skandaleve të blerjes së votave në zgjedhjet e shkuara dhe po kaq përcaktuese për përmbushjen e një prej kritereve të rëndësishme nga 15 kushtet për integrimin europian të Shqipërisë.”

Ndryshe, në kohën kur mazhoranca vazhdon të mos i kthej përgjigje opozitës për mbledhjen e Këshillit Politik dhe arritjen e një marrëveshje, Komisioneri për Zgjerimin pranë BE, Oliver Varhelyi, u shpreh:

“Reforma elektorale në Shqipëri: Inkurajoj të gjitha palët, brenda dhe jashtë parlamentit, që të bëjnë sërish një përpjekje dhe të arrijnë një marrëveshje. Kjo është një reformë e rëndësishme që duhet të dhe do të ishte për të ardhur keq nëse ky moment do të humbej. Shpresoj për një marrëveshje: kjo është thelbësore.”