BE: Serbia të mos i madhërojë kriminelët e luftës

Bashkimi Evropian paralajmëron liderët politikë dhe fetarë në Serbi që të mos madhërojnë kriminelët e luftës. Reagimi vjen pas lajmit se Kisha Ortodokse Serbe dekoroi Vojisllav Sheshelin, i dënuar nga Gjykata e Hagës për krime të luftës në ish-Jugosllavi.

“Përpjekjet për të rishkruar historinë janë të papranueshme,” tha zëdhënësja e Komisionit Evropian, Ana Pisonero, duke folur për një qëndrim të qartë që ka Brukseli.

“Qëndrimi i BE-së është i qartë. Nuk ka vend në Evropë për mohimin e gjenocidit, revizionizëm dhe madhërim të kriminelëve të luftës – gjëra që janë në kundërshtim me vlerat themelore evropiane.”

Pisonero tha se nga udhëheqësit fetarë pritet që të punojnë drejt pajtimit dhe tejkalimit të ndasive nga e kaluara.

“Prijësit fetarë dhe bashkësitë fetare kanë, po ashtu, përgjegjësi që të dëshmojnë lidership në përpjekjet për tejkalimin e trashëgimisë së vështirë nga e kaluara, si dhe të ndërtojnë në mënyrë konstruktive mirëbesim të ndërsjellë, tolerancë dhe dialog.”

Ndryshe, Sheshelit iu dha urdhri “Peshkopi i Shenjtë Mardari” nga një dioqezë e Kishës Ortodokse Serbe me seli në Çikago.

Çmimi iu dorëzua të dielën nga Peshkopi Irinej i Baçkës, njoftoi Partia Radikale Serbe e Sheshlit.

Kjo është hera e tretë që Kisha Ortodokse Serbe i ndan çmime Sheshelit.

Sheshel, udhëheqës i Partisë Radikale Serbe, u dënua në vitin 2018 me dhjetë vjet burg nga Gjykata e Hagës për, siç është thënë, nxitje të persekutimit, dëbimit, zhvendosjes dhe transferimit të dhunshëm të kroatëve nga fshati Hërtkovci në Vojvodinë, më 1992.

Vojisllav Sheshel u la i lirë për shkaqe shëndetësore dhe pasi kishte qëndruar në paraburgim në Hagë nga viti 2003 deri më 2014.