BE shpreh keqardhje për anulimin e takimit Brdo-Brioni nga Kroacia

Presidenti i Kroacisë, Zoran Milanoviç, e ka anuluar takimin vjetor të Procesit Brdo-Brioni, sepse, sipas tij, nuk ekzistojnë kushtet për ardhjen e Presidentit të Serbisë, Aleksandar Vuçiç, në Kroaci.

Deklaratat dhe veprimet politike të presidentit të Serbisë kohët e fundit, sipas Milanoviçit, janë plotësisht në kundërshtim me qëllimin e Procesit Brdo-Brioni, dëmtojnë marrëdhëniet ndërshtetërore dhe rrezikojnë paqen dhe stabilitetin në rajonin e Evropës Juglindore.

Presidenti serb Vuçiç ka kohë që ka ashpërsuar narrativën kundër Kroacisë.

Bashkimi Evropian ndërkohë shprehu keqardhje për anulimin e takimit dhe për zhvillimet që çuan deri te ky vendim.

“Marrëdhëniet e fqinjësisë së mirë janë në zemër të procesit të integrimit evropian dhe një pjesë thelbësore e rrugës së Serbisë drejt BE-së. Ato kontribuojnë në stabilitet, pajtim dhe një klimë të favorshme për adresimin e çështjeve të hapura dypalëshe dhe trashëgimisë së së kaluarës,” ka deklaruar zëdhënësi i Komisionit Evropian, Guillaume Mercier.

Procesi Brdo-Brioni është themeluar në vitin 2013. Bëhet fjalë për një ngjarje vjetore në Ballkanin Perëndimor, ku mblidhen presidentët e të gjitha shteteve të rajonit.