BE synon të vaksinojë 70% të të rriturve deri më 1 qershor

Bashkimi Evropian po synon të vaksinojë kundër koronavirusit 70 për qind të popullsisë së rritur deri në qershor, tha sot Zv/Presidenti i Komisionit Evropian, Margaritis Schinas, në një konferencë për media duke saktësuar se Plani është dakorduar nga të gjithë komisionerët e BE-së.

Blloku filloi vaksinimin tre javë më parë dhe deri më tani ka miratuar dy vaksina, atë nga BioNTech/Pfizer dhe atë të kompanisë Moderna. Por, ritmi i vaksinimit po zvarritet dhe qëndron pas vendeve të tilla si SHBA-ja, Britania e Madhe, Izraeli dhe Emiratet e Bashkuara Arabe.

Komisionarja e Shëndetësisë, Stella Kyriakides tha se në bazë të strategjisë së blerjes së përbashkët të BE-së, do të ketë doza të mjaftueshme për të vaksinuar 80 për qind të popullsisë së BE-së prej 450 milionësh. Ajo pranoi, megjithatë, se procesi i vaksinimit duhet të përshpejtohet.

Ndërsa Zv/Presidenti i Komisionit Evropian, Margaritis Schinas, dha edhe datën:

“Deri në verë, vendet anëtare duhet të kenë vaksinuar një minimum prej 70 për qind të popullsisë së rritur. Kjo duhet të ndodhë para 1 qershorit.”

Presidentja e Komisionit Evropian, Ursula von der Leyen, tha përmes një deklarate, raporton RFE, se përmbushja e qëllimit prej 70 për qind, brenda katër muajve, të ardhshëm mund të jetë një pikë kthese në luftën tonë kundër këtij virusi.