BE zgjohet pas 10 viteve: Kosova dhe Serbia do të ndalin menjëherë tensionet

Me fillimin e aplikimit të reciprocitetit për targat e automjeteve që vijnë nga Serbia në Kosovë ka reaguar menjëherë Bashkimi Evropian, BE, përmes zëdhënësit Peter Stano, edhe pse plotë 10 vjet nuk u shqetësua pse Serbia kërkon nga qytetarët e Kosovës targa të përkohshme për territorin serb

“Jemi duke vëzhguar situatën nga afër dhe dua të theksoj liria e lëvizjes është një kusht themelor i BE-së dhe këtë e presim edhe nga Kosova dhe Serbia që ta promovojnë atë. Ne u bëjmë thirrje të dyja palëve që të përmbahen dhe të reduktojnë tensionet. Menjëherë dhe pa ndonjë vonesë,” tha Stano duke shtuar se Kosova dhe Serbia duhet të përdorin dialogun si platformën e vetme për të zgjidhur të gjitha çështjet e hapura që mund t’i kenë këto dy vende, përfshirë edhe lirinë e lëvizjes ndërsa përfundoi”

“Përfaqësuesi Special i BE-së për dialogun Kosovë-Serbi, Miroslav Lajçak, tashmë ka arritur në Beograd dhe në takimin me presidentin Vuçiç, këtë pasdite, do ta adresojë situatën dhe pas disa orëve ai do të flasë edhe me lidershipin politik të Kosovës për të adresuar këtë çështje.”

Ndryshe, me Marrëveshjen e Brukselit për lëvizjen e lirë, e cila u arrit në korrik të vitin 2011 në dialogun teknik ndërmjet Kosovës dhe Serbisë, ishte përcaktuar që të gjithë pronarët e automjeteve që banojnë në Kosovë, duhet të përdorin targat ‘KS’ (Kosovë) ose ‘RKS’ (Republika e Kosovës) dhe kështu t’i hiqnin nga përdorimi targat që për serbët e Kosovës i lëshonte Ministria e Punëve të Brendshme e Serbisë.

Në takimin e 7 dhe 8 shtatorit të këtij viti në Brruksel, me zyrtarët e Bashkimit Evropian dhe të palës serbe, është ngritur çështja e heqjes së këtyre targave por pala e Kosovës e ka hedhur poshtë mundësinë që të trajtohet kjo çështje, sepse që në shtator të vitit 2016, ishte arritur marrëveshja që targat “KS” të hiqeshin fare dhe automjetet e të dyja vendeve të bartnin targat përkatëse gjatë qarkullimit në territorin e njëra-tjetrës.