Benet Beci në celularin e gruas së Evis Berberit, SPAK e vë nën hetim për shitblerjen e energjisë
Celulari i që iu sekuestrua bashkëshortes së Ish-Drejtorit të Përgjithshëm të Rrugëve, Evis Berberit, i cili u arrestua nën dyshimet për korrupsion, i hapi telashe Kryetarit të Bashkisë Shkodër, Benet Beci, që tashmë është vënë zyrtarisht person nën hetim nga SPAK.
Gjatë hetimeve për Evis Berberin, Prokuroria e Posaçme ushtroi kontroll në bankën e ish-kreut të Autoritetit Rrugor dhe sekuestroi celularin e tij dhe të bashkëshortes, që u zbërthyen më pas nga hetuesit e BKH-së.
Mësohet se në celularin e bashkëshortes së Evis Berberit, që ishte zyrtare e Korporatës Elektroenergjetike Shqiptar janë zbuluar komunikime me Benet Becin, kohë kur ai ishte Drejtor i KESH, dhe që kishin të bëjnë me disa kontrata për shitblerjen e energjisë.
Pas sigurimit të këtyre të dhënave, SPAK thirri në pyetje dhe më pas i komunikoi Kryetarit të Bashkisë Shkodër se është nën hetim, ndërsa janë marrë dëshmitë e dhjetëra zyrtarëve e ish-zyrtarëve të KESH.
Përveç Benet Becit nën hetim janë dhe disa zyrtarë të lartë të Ministrisë së Infrastrukturës dhe Energjisë.
Ndryshe, KESH është akuzuar në disa raste për çmime apo kontrata abuzive për shitblerjen e energjisë. Hetimi pritet të hedhë dritë mbi implikimin e zyrtarëve të KESH dhe MIE, dhe dëmin që kanë shkaktuar.
