Beograd, protesta kundër Vuçiçit: Stop Tradhtisë, Mbroje Kushtetutën dhe Mbështete Popullin

Me mijëra qytetarë kanë marshuar sonte në mbrëmje përmes qendrës së ngrirë të Beogradit për të protestuar kundër presidentit serb, Aleksandar Vuçiç dhe partisë së tij udhëheqëse, Partisë Përparimtare Serbe, SNS, duke kërkuar liri të mediave dhe fund sulmeve ndaj gazetarëve e figurave politike opozitare.

Protestuesit u frynin bilbilave, mbanin në duar pankarta me mbishkrime “Stop Tradhtisë, Mbroje Kushtetutën dhe Mbështete Popullin”, dhe thërrisnin “Vuçiç Hajdut” në protestën e pestë për pesë fundjava, raporton Reuters.

Protestat, që janë mbajtur edhe në qytetin e Kragujevcit, u nxitën nga një incident në muajin nëntor kur politikani opozitar, Borko Stefanoviq, u rrah nga sulmues të panjohur në qytetin e Krushevcit.

Përkrahës të Aleancës për Serbinë, një grupim i 30 partive opozitare dhe organizatave të ndryshme, theksojnë se Vuçiç është një autokrat dhe partia e tij është e korruptuar, diçka që liderët e saj e kundërshtojnë fuqishëm.

Protestuesit kërkuan mbulim më të madh të grupeve opozitare nga transmetuesi publik dhe garanci për hetim të detajuar të sulmeve ndaj gazetarëve dhe politikanëve opozitarë.