“Berisha” në GJKKO, shtyhet seanca, SPAK kërcënon avokatet
Gjykata e Posaçme ka shtyrë sërish seancën për Kryetarin e PD, Sali Berisha, pasi edhe avokatet e caktuara nga shteti kërkuan kohë të njihen me dosjen.
Deri sa GJKKO i la kohë deri në orën 15:00 të njihen me aktet e procedimit, avokatja e caktuar nga shteti, Rabie Cenalia ka kërkuar dy ditë kohë për t’u njohur me çështjen, kërkesë pas cilës ajo u kërcënua nga prokurorët e SPAK se do të njoftojnë Dhomën e Avokatisë që ajo po refuzon mbrojtjen.
Ndërkohë avokatja Cenalia sqaroi se nuk kishte refuzuar, por vetëm kishte kërkuar më shumë kohë për të studiuar dosjen.
“Nuk refuzova mbrojtjen. Me caktuat mbrëmë në orën 20.00 këtë çështje. Ndaj dua kohën e nevojshme për të studiuar dosjen. Duhet te studioj dosjen për të bërë mbrojtje efektive pasi materiali është shumë voluminoz,” mësohet të jetë shprehur avokatja e caktuar nga shteti Rabie Cenalia.
Ndërsa avokatia tjetër e caktuar nga shteti, Jalldiz Kastrati pohoi se ka pranuar të jetë palë mbrojtëse për Sali Berishën.
Ndryshe, pasi Gjykata e Posaçme refuzoi tu japë avokatëve të caktuar nga Kryetari i PD, Sali Berisha, materialet e nevojshme që ata kërkuan, pas largimit të tyre GJKKO vendosi të emëroj një avokat nga lista e depozituar në gjykatë, Artan Simonin, i cili rezultoi më militant komunist se Taulant Balla dhe Arben Kraja.
Përveç përkatësisë partiake, në rrjetin social Facebook, avokati Simoni shprehte në postimet e tij dhe urrejtjen e shfrenuar ndaj atij që shteti e kishte caktuar ta mbrojë:
“Bisha është plakur, bisha është lodhur, bisha s’mundet më. Shumë prej atyre që dikur bisha mbante mbi kurriz, pas kurrizit kanë filluar t’a çukasin. Ku gaboi bisha?!”, shprehet avokati Artan Simoni ditë më parë në Facebook i caktuar si pa dashje nga gjykata e reformuar e Edi Ramës, që ishte arsyeja të ndërrohet si avokat i përzgjedhur nga shteti në çështjen “Berisha”.
Njoftimi:
“Në datën 26.10.2023, ora 10.30, në Gjykatën e Posaçme të Shkallës së Parë për Korrupsionin dhe Krimin e Organizuar, u çel seanca gjyqësore për vijimin e shqyrtimit të kërkesës së paraqitur nga Prokuroria e Posaçme, me objekt marrjen në pyetje të shtetasit nën hetim Sali Berisha.
Gjykata pasi verifikoi praninë e palëve, konstatoi se nuk ishte paraqitur personalisht i hetuari Sali Berisha dhe se ishin paraqitur 2 mbrojtësit e thirrur për caktim kryesisht nga gjykata, av.Jalldiz Kastrati dhe av.Rabije Cenalia.
Nga ana e gjykatës, iu la kohë mbrojtësve për tu njohur me aktet e procedimit penal të fazës së hetimit paraprak, të përcjella nga ana e Prokurorisë së Posaçme dhe për këtë arsye ndërpreu shqyrtimin gjyqësor, për të rifilluar ditën e sotme, në orën 15.00,” thuhet në njoftim.
Procesi politik kundër kreut të PD ka shënuar disa shkelje të rënda kushtetuese.
