Berisha nga Librazhdi: Shefki Çota është kandidat i dinjitetit, kushoja e Taulantit vjen nga xhepat

Duke prezantuar kandidatin e koalicionit “Bashkë Fitojmë” për kryetar të Bashkisë Librazhd, Shefki Çotën, Kryetari i Partisë Demokratike, Sali Berisha, tha se ai është një përfaqësues i denjë, një menaxher i shkëlqyer, një familjar shembullor, një njeri i aftë dhe një qeveritar i vërtetë dhe nga ana tjetër kemi kandidatin e xhepave të Taulant Ballës!

“Unë jam sot para jush jo për një fjalim, por për një bisedë të hapur, bisedë zemre me çdo qytetar të Librazhdit, por dhe çdo shqiptar.

Me 14 maj, ne shkojmë në zgjedhje dhe këto zgjedhje në vlerësimin tim më të sinqertë, para se të gjithash janë zgjedhje të çdo qytetari për veten e tij.

Nuk janë zgjedhje këto as për Sali Berishën, as për Edi Ramën, por janë mbi të gjitha zgjedhje për ju, për çdo qytetar.

Janë për interesat tuaja, janë për dinjitetin tuaj, janë për mirëqenien tuaj.

Vërtet me 14 maj ju votoni për Shefki Çotën, dhe votoni për kushon e Taulantit, por do më falni, Shefki Çota është njëri prej jush. Është një qytetar i këtij rrethi, i këtij qyteti, i cili ka qeverisur Librazhdin dhe sot vendosi që aftësitë e tij, dashurinë e tij për ju dhe Librazhdin, të kërkojë sërish votëbesimin tuaj.

Shefki Çota, sot në dallim me Shefkiun e mëparshëm, nuk është kandidat i Sali Berishës, as i kryesisë së PD, është i juaji. Ju votoni kandidatin që keni përzgjedhur, kandidatin që keni votuar, votoni kandidatin e dinjitetit tuaj. Liria e njeriut ka në thelb dinjitetin e tij dhe ju respektuat dinjitetin tuaj. Ne e respektuam atë gjithashtu,” tha Sali Berisha në Librazhd në prezantimin e kandidatit të Kolaliconit “Bashkë Fitojmë” duke shtuar:

“Le të vijë Shefkiu këtu, le të vijë kusho i Taulantit, ai vjen nga xhepat e Taulantit, vjen nga skutat e Edi Ramës.

Le të më thotë një i majtë nga Librazhdi, që është pyetur apo ka dhënë votën apo mendim që kushoja të kandidojë për kryetar bashkie. Asnjë, as këtu dhe askund në Shqipëri.

Ata dolën nga bodrume mafioze dhe ju e patë vetë se çfarë përfaqësojnë.

Le të marrim realitetin si është sot! Ne jemi vendi me rrogat më të ulëta në rajon. Sot ne jemi vendi me varfërinë më të dhimbshme në rajon. Por ama në vitin 2013 ishim vendi me rrogat më të larta në rajon. Ato rriteshin vit pas viti dhe me rritjen e tyre, rritej shpresa. Kurse sot,” lideri i opozitës sugjeron demokratët e Librazhdit:

“Ju votoni për veten tuaj, sot ndodhi që rrogat u ngrinë, por çmimet nuk u ngrinë. Çmimet në kushte tregu nuk i ngrin dot njeriu. Çmimet u rritën nga viti në vit dhe sot është shumë e dhimbshme. Vetëm nga rritja e çmimeve vitin e kaluar, çdo pensionist ka lënë dy pensione për ushqime më shumë se dy vite më parë. Ka shpenzuar, sipas ekonomistëve të pavarur, 430 mijë lekë ushqime më shumë. Sepse është dyfishuar çmimi i djathit, qumështit, mishit, zarzavateve, etj.

Çdo qytetar ka lënë një rrogë më shumë.

A ju kujtohet ju premtimi i Edi Ramës për rrogën e 13-të. Jo vetëm që nuk ua dha rrogën e 13-të, por u mori edhe rrogën e 12-të.

Të mbështesësh më 14 maj përfaqësuesit e Edi Ramës, mbështet varfërinë!” tha Kryetari i Partisë Demokratike duke shtuar se Edi Rama nuk ka skuadra pushkatimi si Enver Hoxha, por ka përzënien nga Shqipëria.

Çdo qytetar me integritet voton për veten e tij.

Sepse ne shqiptarët, më shumë se çdo komb tjetër, e dimë se ç’do të thotë pushtet i përqendruar në një dorë. Çfarëdo qoftë ajo që përqendron pushteti, diktator komunist, diktator teokrat, diktator ushtarak, diktator bandit siç është rasti në Shqipëri, ai vetëm të këqija krijon për shtetasit e tij.

Po sot, cili është ai që më thotë se Edi Rama nuk ka përqendruar të gjitha pushtetet në duart e tij.
Në disa aspekte, absolutisht më shumë se vetë Enver Hoxha. Ju mund të thoni pse krahasoni?

Shiko, Edi Rama nuk ka skuadra pushkatimi, nuk ka kampe përqendrimi, por Edi Rama ka përzënien nga Shqipëria. Edi Rama po përzë shqiptarët nga Shqipëria me politikat që ndjek.

Po i përzë vetëm se e di që nuk e votojnë!

Ky njeri që ka të gjitha pushtetet, si u soll me ju? Së pari dyfishoi taksat e biznesit. Së dyti, çfarë bëri për fermerët e fshatit? Ekziston një shprehje e studiuesve të diktaturave dhe ata thonë se diktaturat ndalojnë kohën në kuptimin e moszhvillimit,” tha Kryetari i Partisë Demokratike, Sali Berisha, para demokratëve të Librazhdit duke bërë në fund dhe thirrje:

Tani duhet të bashkohemi. Të votojmë Shefki Çotën.

Ai është një përfaqësues i denjë i juaj, një menaxher i shkëlqyer, një familjar shembullor, një njeri i aftë, një qeveritar i vërtetë.

Por edhe një qytetar njëlloj si ju.

Vërtet ju votoni për veten tuaj dhe në këto zgjedhje, të votosh Edi Ramën, do të thotë të votoni për thellimin e varfërisë, për dëbimin e shqiptarëve nga Shqipëria.

Por përsëri, qeverisja vendore ka shumë në dorë të ndryshojë për mbarë jetën tuaj.

Ka shumë në dorë të nxisë lulëzimin e biznesit, të përgjysmojë taksat. Kjo do të thotë dyfishim punësimi.
Të bëjë gjithçka për ndarjen e drejtë të buxhetit deri në zonat më të largëta.”