Berisha nga Tropoja: Asnjë verior nuk mund t’i japë votën Edi Ramës!

Racistit që e ka sivëlla Vuçiçin, Edi Ramës, asnjë verior nuk mund t’i japë votën Ramës, tha Kryetari i Partisë Demokratike, Sali Berisha, një takimin elektoral me kandidatin e Koalicionit “Bashkë Fitojmë,” për Bashkinë Tropojë, Besnik Dushaj.

Duke i bërë thirrje çdo banori të Tropojës të dalë në zgjedhje, Kryetari i Partisë Demokratike i bëri thirrje malësorëve të Malësisë së Gjakovës kudo që janë, në Tiranë, në Shqipëri, në Kosovë, në Europë dhe kudo që ndodhen, që më 14 maj të vijnë dhe të votojnë, të vijnë dhe të firmosin ndryshimin, të firmosin fitoren!

“Përulem me mirënjohjen më të pakufishme, nderimin më të madh para jush, para të gjithë malësorëve për qëndrimet tuaja, për mbështetjen tuaj, për rolin që luani në fatet e Malësisë së Gjakovës, por edhe të gjithë Shqipërisë.

Ju sjell përshëndetjet më të zjarrta, frymën e fitores nga Peshkopia, Bulqiza, Burreli, Klosi, Mamurrasi, Fushë Kruja dhe mbarë Shqipëria.

Kjo pranverë shënon njëlloj si pranvera e vitit 1992, fundin e sistemit monist, fundin e pushtetit të përqendruar në duart e një njeriu, fundin e atij sistemi që ka sjellë për shqiptarët, por edhe për çdo vend tjetër ku është instaluar, dramat më të mëdha njerëzore.

Sot ne vijmë në këtë shesh më të vendosur se kurrë, më të sigurt se kurrë, me 14 maj me votën tonë, duke votuar për Besnik Dushën, qytetarin shembullor, menaxherin e shkëlqyer, kemi votuar për përmbysjen e monizmit dhe vendosjen e pluralizmit.

Besnik Dusha është një malësor që mishëron vetitë më të arrira tuajat, dashurinë e madhe për Malësinë e Gjakovës, për qytetarët e saj, përkushtimin e pakufizuar për të bërë të mundur shërbimet më dinjitoze që meritoni, për të përdorur taksat tuaja në mënyrën më transparente.

Besnik Dusha ka një detyrë, ajo detyrë është të ftojë këtu në këtë shesh, para jush, Rexh Byberin dhe t’i thotë: hajde t’u japim llogari këtyre qytetarëve, t’i nxjerrim xhepat, të bëjmë bilancet, çfarë ke bërë ti dhe çfarë kam bërë unë gjatë qeverisjes, t’u thuash të gjitha mendimet që ke,” tha Sali Berisha duke akuzuar kryetarin aktual të Bashkisë Tropojë, Rexhë Biberaj, se e ka shndërruar bashkinë në një gropë më të thellë se përroi i Shendelicës.”

“Dalja e qeveritarëve para qytetarëve është akt ligjor dhe moral i detyrueshëm. Por Rexha nuk del sepse nuk mund të dalë. I del gropa e madhe që ka bërë në bashki, i dalin tenderat që i ka dhënë siç ai i din. I dalin të gjitha aktet e tij, me të cilat vërtet nuk iu ka shërbyer qytetarëve të Malësisë së Gjakovës, por vetëm xhepit të tij.

E pashë në Kukës me Edi Ramën, Edi Rama i thoshte Safet dhe Rexhë, vallen e Tropojës, por ata dinë vetëm vallen e lekut, nuk dinë valle tjetër.

Këto zgjedhje janë shumë më tepër, janë shumë më tepër se zgjedhje për qeveri vendore. Janë zgjedhje kundër një njeriu që ka pushtuar, ka marrë në dorë të gjitha pushtetet dhe i përdor kundër qytetarëve. Kundër një njeriu që ka zbrazur Tropojën si asnjë pushtim. Ka larguar çdo institucion. Kundër një njeriu, që javën e parë që erdhi në pushtet, preu ndihmën ekonomike për qarkun e Kukësit në 20 mijë familje. Një racist i egër! Preu ndihmën ekonomike vetëm pse nuk e votuan në vitin 2013,” tha lideri i opozitës duke shtuar se Tropoja dhe veriu, pas Enver Hoxhës dhe Car Dushanit, armikun më të egër, racistin më të papërmbajtur kanë Edi Ramën.

Asnjë verior nuk mund t’i japë votën atij. Edi Ramës nuk i jepet vota. U them socialistëve të Tropojës se kam respekt për ta, për qëndrimin në opozitë siç kam qëndruar edhe vetë. Por nuk i jepet vota atij që i thotë se e kam sivëlla Vuçiçin dhe kundërshtar Albin Kurtin.”

Me këtë rast Berisha e bëri të qartë se pas rivendosjes së pluralizmit me votimin e Besnik Dushës, shumë shpejt Edi Rama do i thotë mirupafshim pushtetit.

“A mund të votohet Edi Rama, që nga viti në vit, u zhyti ju, i zhyti të gjithë shqiptarët në varfëri dhe mjerim?

Nga viti 2013 gjer më sot, çmimet arritën në stratosferë. Vetëm nga viti 2021-2022, secili prej jush ka paguar për ushqimet, 430 mijë lekë më shumë. Keni paguar dy pensione më shumë, pothuajse një rrogë më shumë. Jo vetëm që nuk rriti rrogat, por vuri bordet komuniste për t’ua rritur çmimet,” tha Kryetari i Partisë Demokratike duke shtuar se nëse vendosin tiraninë e varfërisë, ata nuk kanë alternativë tjetër vetëm të nisen për një jetë më të mirë.

“Ndaj edhe në tetë vite, si kurrë në historinë e këtij kombi, u larguan nga vendi një e treta e shqiptarëve. Ndryshimi është jetik! Shqipëria është në rrezik ekzistencial. Nëse vazhdohet me këto ritme, çfarë do mbetet në Shqipëri pas 16 vitesh?

Është koha që secili t’i thërrasë vetëdijes së tij si shqiptar. Pavarësisht nga bindjet partiake, të ndahemi me këtë njeri.

Me Edi Ramën, udhëtimi është një udhëtim drejt varfërisë, udhëtim drejt skamjes, udhëtim drejt boshatisjes së Shqipërisë, udhëtim drejt pasigurisë dhe krimit, udhëtim drejt vjedhjes së buxhetit dhe pasurisë së qytetarëve.

14 maji duhet të jetë fundi i tij.

U garantoj se pas rivendosjes së pluralizmit me votimin e Besnik Dushës në Tropojë, në një afat shumë të shkurtër, Edi Rama do i thotë mirupafshim pushtetit.

Ose do shkoje te McGonigal, ose aty ku e kanë vendin kriminelët elektoralë, aty ku e kanë vendin ata që kanë vjedhur qindra milionë euro, ata që kanë kryer gjenocid ndaj shqiptarëve duke i larguar nga vendi i tyre,” tha Kryetari i Partisë Demokratike, Sali Berisha, para demokratëve të Tropojës duke bërë thirrje:

“Ftoni çdo banor të këtij rrethi të dalë në zgjedhje. Nuk është koha më për zhgënjime.

Asnjë votë për Rexh Byberin. Kurrë mos votoni për ata që për hir të xhepit, ndërrojnë parti. Çdo socialist i Tropojës është 10 herë me më shumë integritet se Rexh Byberi. U garantoj se kësaj radhe, askush nga Biberajt nuk do e votojë.

14 maji është ditë ndryshimi i madh, hapet rruga për rrëzimin e këtij regjimi monist.

Ju bëj thirrje malësorëve të Malësisë së Gjakovës kudo që janë, në Tiranë, në Shqipëri, në Kosovë, në Europë dhe kudo që ndodhen. Më 14 maj të vijnë dhe të votojnë. Tropoja ka nevojë jetike për votën e tyre, e cila kësaj radhe është votë misionare.

Është koha të votojmë, të votojmë ndryshimin, ndryshimi është në duart e gjithsecilit. Ne do fitojmë!”