Bërnabiç kërkon falje që Kosova u cilësua Republikë
Kryeministrja e Serbisë, Ana Bërnabiç, tha se në një prej raporteve të publikuara në web-faqen e Qeverisë serbe ishte shkruar Republika e Kosovës, duke shtuar se ky rast kishte të bënte me gabim gjatë përkthimit.
Bërnabiq tha për Televizionin shtetëror të Serbisë, RTS, tha se gabimi kishte ndodhur në përkthimin në gjuhën angleze. Ajo tha se ky gabim “është i rëndë dhe i pafalshëm i përkthyesit”.
Bërnabiç tha se përgjegjësi ka edhe ekipi i zyrës për media në Qeverinë serbe, prandaj ajo shtoi se do të ketë pasoja për punëtorët që lëshuan këtë gabim.
Kryeministrja serbe tha se kjo përmbajtje është larguar menjëherë nga web-faqja e Qeverisë serbe.
“Nuk mund të flija mbrëmë, nuk e di se çfarë po bëj. Por, më vjen keq që kjo po përdoret nga opozita për të fituar pikë politike”, tha Bërnabiç duke reaguar pas publikimit të këtij “gabimi” nga Ish-Ministri i Jashtëm, Vuk Jeremiç.
Vlade Srbije je objavila na svom sajtu informaciju o skupštinskoj raspravi o KiM.
— Vuk Jeremić (@jeremic_vuk) February 5, 2023
U verziji na engleskom, potpuno opušteno navode “REPUBLIC OF KOSOVO”.
Ili su izdajnici ili neznalice. Ili oba.
Za ovo bi se u Španiji ili na Kipru podnosile ostavke.https://t.co/tLWR4F5grP pic.twitter.com/bTKJayQFS8
Kryeministrja serbe po ashtu foli edhe për vizitën e planifikuar për 6 shkurt të të dërguarit të Bashkimit Evropian, Mirosllav Lajçak, në Prishtinë dhe Beograd.
Ajo tha se aktivitete të tilla diplomatike po shtohen dhe presioni po intensifikohet, duke shtuar se beson në garancitë e komunitetit ndërkombëtar sa përket themelimit të Asociacionit të komunave me shumicë serbe.
Bërnabiç tha se Lajçak do të vizitojë fillimisht Prishtinës, dhe se sipas saj, atje qëndron problemi i themelimit të Asociacionit. Ajo theksoi se nuk i intereson qëndrimi i kryeministrit të Kosovës, Albin Kurti, lidhur me këtë çështje.
Kryeministrja serbe tha se palët janë pajtuar që të formohet Asociacioni në kuadër të marrëveshjeve të arritura në Bruksel më 2013 dhe 2015 dhe theksoi se beson në garancitë e komunitetit ndërkombëtar se Asociacioni do të formohet në bazë të marrëveshjeve të arritura në dialog.
Kosova kundërshton themelimin e një asociacioni njëetnik, duke shprehur frikën se mund të krijohet një Republika Srpska, ashtu sikurse në Bosnje Hercegovinë.
SHBA dhe BE po kërkojnë që Kosova të zbatojë marrëveshjet për Asociacionin. Washingtoni ka shprehur qartë se është kundër themelimit të një asociacioni që do t’i ngjasonte Republikës Sërpska.
Ndryshe, Kosova shpalli pavarësinë më 2008, por Beogradi refuzon që ta njohë atë. Qëndrimi zyrtar i Serbisë është që Kosova është ende pjesë e saj./RFE/
