Besnik Bislimi në Prokurorinë Speciale

Zv/Kryeministri në detyrë i Kosovës, Besnik Bislimi, sot është paraqitur në Prokurorinë Speciale pasi është ftuar për të dhënë deklaratë lidhur me hetimet mbi dhënien me qira të Fabrikës për Mbetje Shtazore nga Ministria e Bujqësisë, Pylltarisë dhe Zhvillimit Rural.

Ishte ministri në detyrë i Bujqësisë, Faton Peci, ai që e ka përmendur Bislimin për çështjen e funksionalizimit të kësaj fabrike.

Lidhur me këtë rast Policia e Kosovës me urdhër të Prokurorisë  Speciale, në fund të muajit të kaluar, kreu bastisje në katër lokacione të ndryshme në Prishtinë e Ferizaj, nën dyshimin për keqpërdorim të kontratës për dhënien me qira të kësaj fabrike.

Ndryshe, deri më tani, lidhur me këtë rast janë intervistuar ministri i Bujqësisë, Faton Peci dhe Kryeshefi i Agjencisë së Ushqimit dhe Veterinës, Bekim Hoxha.

Dyshohet se kompania e cila mori në shfrytëzim për 20 vjet Fabrikën për Mbetjet Shtazore, nuk i ka përmbush kriteret, si përvojë 12 deri në 15 vjeçare në përpunimin e nënprodukteve shtazore, dhe të dëshmonte se në tre vjetët e fundit kishte përpunuar 20 mijë tonë të nënprodukteve shtazore.

Gjithçka filloi pas raportimit se kompania kosovare LIP KS & IT SH.P.K. e cila u përzgjodh për ta funksionalizuar fabrikën, me afat operimi për 20 vjet, përkatësisht deri më 2044, u regjistrua në Agjencinë e Regjistrimit të Bizneseve të Kosovës, ARBK, 5 ditë pas thirrjes për aplikim.

Në dhjetorin e vitit 2019, në Parkun Industrial në Drenas përfundoi ndërtimi i Fabrikës ku u parashikua se do të përpunohen dhe asgjësohen nënproduktet shtazore. Por, funksionalizimi i Fabrikës nisi në vitin 2024, kur u hap dhe thirrja për kompanitë që të aplikonin për marrjen në shfrytëzim të Fabrikës për Mbetjet Shtazore.